DILI, STLTIMORLESTE.com – Mate isin Jose Antonio Rebelo da Silva too ona iha Timor, iha loron Domingu nee, no entrega diretamente husi Sekretaria Estadu Formasaun Profisional no Empregu (SEFOPE) ba iha familia matebian sira, iha Aereportu Internasional Nicolau Lobato.
Lori Sekretariu Estadu nia naran hatoo sentidu kondolensia profunda ba familia matebian, objetivu husi ita nia programa nee, ita haruka ita nia maluk sira ba servisu iha rai liur atu hadia ita nia moris familia no mos ita nia nasaun, ita nia planu oin seluk Maromak nia hakarak oin seluk, tanba nee mak ita simu ita nia maluk, ita nia oan, ita nia kaben, ita nia maun, ita nia alin, ita nia subrinhu Jose Antonio, mai ho nia isin mate mak ohin ita simu,” dehan Diretor Jeral SEFOPE, Carlito do Rosario Cabral ba jornalista sira iha Aeroportu Internasional Nicolao Lobato, Komoro, Dili, Domingu nee (09/02/2025).
Nia hatutan, ida nee mak realidade neebe ita hasoru, sira nee ita konsidera hanesan eroi foun ba nasaun, eroi ba dezenvolvimentu, konsidera hanesan eroi ba ita nia familia no mos ba ita nia nasaun. No esforsu hotu ita halo, maske dook iha Timor maibe halo komunikasaun ho adidu reprezentante SEFOPE nia liman ain iha Korea do Sul, maibe la konsege salva nia vida, tanba dezastre neebe nia hetan todan tebes.
Nunee SEFOPE nia responsabilidade oinsa atu halo kordenasaun ho reprezentante iha Korea do Sul, nunee ita nia matebian nia isin mate bele mai too fali iha Timor, hodi SEFOPE entrega fali ba iha familia, hodi halao serimonia funebre tuir idak-idak nia kultura.
Tanba sente lakon eroi ida no eroi ba nasaun, atu hadia ekonomia sira mak ajuda atu hadia ekonomia familia no nasaun. Lori Sekretariu Estadu nia naran hatoo sentidu kondolensia ba familia, no Sekretaria la marka prezensa tanba halao servisu balu iha rai liur, delega ekipa nafatin ba iha fatin nee hodi simu matebian no entrega ba iha familia.
Informa mos ba familia katak, matebian nia sasan balu tarata hela, no tuir informasaun matebian nia tiun ida mos iha Korea, sasan balu sei tarata hela liu husi adidu no matebian nia kolega sira, depois mak sei haruka tuir mai Timor.
Iha fatin hanesan, Funsionariu SEFOPE, Silvester dos Santos lee sai Biografia matebian nian katak, matebian Jose Antonio Rebelo da Silva, moris iha Dili iha loron 17 fulan Julhu tinan 1995, aman Domingos Martins da Silva no inan Ines da Costa Rebelo Guterres, no iha maun alin nain rua. Matebian husik hela nia kaben Adriana da Silva Pereira Olivera no nia oan mane nain ida.
Matebian remata nia eskola Sekundaria iha eskola 5 de Maio iha tinan 2013, iha tinan 2014 matebian kontinua nia eskola iha UNDIL too deit semester haat, la konsege remata. Matebian hahu kursu lian Korea iha tinan 2017, matebian pasa iha ezame Komputer Basic Test, hodi rejista ba sistema SPAS iha tinan 2018, matebian hetan kontratu husi kompania YU JEONGMI iha area Fabrika iha loron 11 fulan Fevereru tinan 2019, hodi ba servisu iha Korea do Sul, no matebian servisu iha Kompanhia neebe nia halao servisu uluk ba, durante tinan 5 fulan 7.
No iha loron ida fulan Setembru tinan 2024 matebian kondus motor ho velosidade neebe makaas, matebian hetan asidente tanba soke poste eletrisidade iha oras tuku 07:00 dader, halo tratamentu durante fulan haat loron sanulu resin hitu, esforsu hotu neebe mediku sira halo atu matebian rekopera, maibe planu Maromak nian ba matebian oin seluk.
Nunee iha loron 18 fulan Janeiru 2025 matebin hakotu nia iis iha Hospital Daejon Korea.
Tuir observasaun jornalista STL iha terrenu haree katak, familia sira neebe ba hein atu simu matebian nia isin, uza hotu faru mutin neebe sablon matebian nia foto, no familia sira simu matebian nia isin mate ho matan-been.
(ter)
