BAUKAU, STLTIMORLESTE.com – Diresaun Servisu Kultura Munisipiu Baukau menus rekursu umanus no fasilidade servisu.
Responsavel Diresaun Servisu Kultura Munisipiu Baukau, Avelino Gaio esplika, servisu esensial ba Diresaun Servisu Kultura mak atu halo levantamentu dadus ba uma lisan sira, verifika hirak neebe hetan estragus no partisipa iha serimonia kultural sira bainhira realiza.
Nia fundamenta, prezensa Diresaun Servisu Kultura iha fatin serimonia kultural nee importante, tanba atu rekolha dokumentasaun hanesan fotografia no videografia husi serimonia kultural sira hodi arkivu iha Diresaun Nasional, neebe objetivu fo benefisiu ba jerasaun foun sira atu buka referensia iha futuru.
Maibe too ohin loron Servisu Kultura Baukau seidauk bele halao servisu hirak nee, tanba menus rekursu umanus no fasilidade atu fasilita servisu iha terenu.
“Diresaun nee enfrenta mak funsionariu, depois fasilidade laiha, ATK zero, fasilidade uluk hetan motorizada iha 2009, maibe laiha manutensaun no la tau mina, ita labele halo buat ida,” hateten Avelino ba STL iha knaar fatin Vila Nova, Baukau, Tersa (08/04/2025).
Nia sublina, Diresaun Servisu Kultura Baukau enfrenta problema menus rekursu umanus no fasilidade inisiu tinan 2008 no tinan 2009 konsege apoiu motorizada ida hodi halao servisu, maibe la apoiu kombustivel no manutensaun ba motorizada, tanba nee la konsege kobre suku sira hodi partisipa serimonia no rekolha dadus bainhira iha akontesimentu estragus uma lisan no serimonia kultura.
Nia konfesa, preokupasaun sira durante nee aprezenta ona ba nasional, maibe kontinua enfrenta difikuldade, tanba seidauk iha rezultadu ba apoiu fasilidade no rekursu umanus
“Servisu mak halo levantamentu uma lulik, rona istoria oral halo gravasaun ba dokumentus sira, maibe ita agora labele halo buat ida, istoria uma lulik nian presiza ita akompanha atu haree, buat neebe komunidade kestiona mak ami nia prezensa laiha, maibe oinsa atu too iha neeba, fasilidade laiha,” Avelino argumentu.
Nia akresenta, Diresaun Servisu Kultura tutela ba Ministeiru Juventude Desportu Arte no Kultura iha IX Governu Konstitusional, maibe hetan fali apoiu husi parte ensinu superior mak hanesan meza ida, kadeira ida, printer ida, komputador ida no armariu ida.
Aleinde mos koloka pesoal nain tolu, nain rua nuudar pontu vokal iha Postu Administrativu Venilale no Vemasi nian, ida apoiu servisu administrasaun iha nivel munisipiu, enkuantu Postu Laga, Kelikai, Baguia, Matebian, Baukau Vila no Kelikai Antigu seidauk hetan kolokasaun.
“Postu neen seidauk nee, durante nee difikuldade, hau propoin ona ba estrutura foun munisipiu nian atu haree,” katak Avelino.
Nia sublina, tuir atribuisaun servisu, Diresaun Servisu Kultura bele servisu hamutuk ho Diresaun Ministeriu Administrasaun Estatal iha Munisipiu, Postu, Suku no Lia Nain sira hodi haree liu ba servisu kultural nian iha baze, maibe postu neen seidauk kompleta nee difikulta servisu, tanba la bele kobre halo levantamentu dadus ba uma lisan.
Nunee propoin ona ba Diresaun Servisu Munisipiu husi Ministeriu Administrasaun Estatal hodi haree kestaun menus rekursu umanus.
(tom)
