DILI, STLTIMORLESTE.com – Servisu Migrasaun rekuza sidadaun estranjeiru nain 50 iha entrada Fronteira, tanba la prienxe rekizitu atu tama mai territoriu Timor Leste (TL), tuir lei migrasaun azilu TL nian.
Kestaun nee hatoo husi Diretora Jeral Servisu Migrasaun Inspetora Xefe Polisia, Adelaide da Rosa ba jornalista sira iha nia knaar fatin Matadoro, Segunda (04/11/2024).
“Ami halo rekuza entrada, tanba sidadaun estranjeiru hirak nee iha balun lori osan la sufisiente, tanba sira deklara katak sira sei hela iha Timor hanesan ema turista durante semana ida, mais sira lori deit osan labele atu kobra ba sira ninia kustu hotu, entaun ita evita buat seluk, duke sira too iha nee sira atu estende vistu, han hemu buat ida laiha, razaun hirak nee mak Servisu Migrasaun halo rekuza imediata haruka fila,” dehan nia.
Nia dehan, Servisu Migrasaun mos halao operasaun rutena, no loke prosesu hasoru sidadaun estranjeiru sira neebe mak halo violasaun ba vistu hamutuk ema 417, nee sei aplika koima tuir infrasaun, husi aplikasaun koima, servisu migrasaun konsege rekolha reseita estadu hamutuk US$ 83.150, reseita balu iha hela prosesu.
Nia hatutan, halo abandona voluntariu sai husi territoriu nasional ba sidadaun estranjeiru hamutuk nain 78, ho mekanizmu entrega sira ba iha sira ninia embaixada, ho nunee embaixada bele repatria sira fila fali ba iha sira ninia nasaun orijen.
“Ita mos halo prevensaun ba atividade rekrutamentu trabalhador ilegal sira neebe mak iha fulan hira liu ba, ita konsege prevene sidadaun Timoroan nain 12, neebe prepara ona atu aranka ba Nasaun Cambodia hodi ba servisu iha online game nian”, katak nia.
Nia dehan, rekrutamentu nee ema deskonhesidu mak halo rekrutamentu, sira nain 12 nee Servisu Migrasaun identifika sai tranzitu ba vítima trafiku umanu ninian, no mos promesa falsu husi ajensia rekrutador sira, kazu rekrutamentu ilegal nee ninia prosesu lao iha investigasaun kriminal PNTL nian, Migrasaun mos servisu hamutuk ho PCIC atu haree lisuk kazu ida nee.
Nia akresenta, Migrasaun mos halo prosesu kazu krime organizadu sira neebe mak liga ho trafiku umanu people smagne ba ema sidadaun husi nasaun balun neebe mak utiliza Timor Leste hanesan sira nia pontu tranzitu hodi ba iha Australia.
Tuir dadus husi inisiu fulan Janeiru too loron 31 fulan Outubru 2024, Servisu Migrasaun rejista movimentu ema tama mai territoriiu nasional hamutuk ema rihun atus rua resin, no ema sai husi territoriu nasional ema rihun atus rua resin, ema hirak nee kompostu husi sidadaun estranjeiru sira no mos sidadaun nasionalidade Timor Leste.
(mar)
