BAUKAU, STLTIMORLESTE.com – Diresaun Servisu Munisipal Obras Publikas Baukau menus transporte, atu fasilita tekniku sira monitoriza projetu estrada no seluk tan iha Munisipiu Baukau.
“Prekupasaun neebe diresaun ida nee infrenta liu liu mak transporte kareta no motor, tanba kuandu ita nia enjineiru sira ba halo supervizaun difisil la halimar,” Diretor Servisu Munisipal Obras Publikas Baukau, Agostinho Ximenes informa ba jornalista sira iha nia knaar fatin Uatulete, Kinta (05/02/2026).
Nia konta, fasilidade hanesan motorizada neebe Ministeriu Obras Publikas destaka iha Servisu Munisipal Obras Publikas Baukau hamutuk unidade 8, maibe unidade 6 neebe atribui ba Servisu Munisipal Obras Publikas Baukau inisiu kedas tinan 2016 no too ohin loron labele ona halo movimentu, tanba kondisaun aat nunee Governu liu husi Ministeriu Obras Publikas deside motorizada 6 refere tama ba leleaun.
No dadaun nee motorizada 2 inklui ho kareta ida mak fasilita enjineiru sira utiliza hodi lao ba terrenu halo monitorizasaun ba projetu sira, maibe motorizada 2 no kareta ida refere seidauk sufisiente, tanba Munisipiu Baukau area luan ho implementasaun projetu barak difikulta tebes enjineiru sira hakbesik aan beibeik iha projetu sira.
“Hau dehan ida nee difikulta, tanba PDIM mos agora ami mos akompanha hotu PDIM nia projetu sira, maibe tanba transporte iha halo supervizaun la adekuadu,” Agostinho katak
Diretor nee komenta, mezmu durante nee Servisu Munisipal Obras Publikas Baukau infrente hela problema menus transporte, maibe enjineiru sira nafatin esforsu fahe tempu hodi kobre projetu sira, maibe la adekuadu, tanba bainhira tempu aserta projetu 2 iha fatin difirente prezisa mos atu halo supervizaun iha tempu hanesan halo enjineiru sira fahe tempu difisil tebes.
Nunee, Servisu Munisipal Obras Publikas Baukau iha tinan 2025 diriji ona proposta ba Ministeriu atu haree preokupasaun refere, maibe seidauk iha resposta, tanba nee husu Ministeriu relevante atu responde prekupasaun Servisu Munisipal Obras Publikas Baukau nian, atu nunee enjineiru halo supervizaun diak liu tan ba projetu sira hodi bainhira projetu ida finaliza iha kualidade.
Entretantu Servisu Munisipal Obras Publikas Baukau iha tekniku supervizor nain 4 nomos enjineiru destakadu nain 7 neebe mak durante nee halao supervizaun no monitorizasaun ba projetu sira iha Munisipiu Baukau.
(tom)
