DILI, STLTIMORLESTE.com – Politika dezenvolvimentu iha setor produtivu lao hanesan “lenuk” ka neineik, tanba membru governu la preseve oinsa mak dezenvolve setor nee rasik ho orsamentu neebe boot ba iha Ministeriu Agrikultura, Ministeriu Komersiu Industria no Sekretariu Estadu Kooperativa.
Tanba tuir Eis Deputadu Virgilio Hornai katak, soberani ekonomia pais nian depende ba politika instrumentasaun hodi hatur planu ida klaru ba metas iha kulturu prazu no longu prazu, maibe lina ministerial sira nee la tau prioridade seriu ba iha investimentu setor produtivu neebe sustentavel liga ho ema nia moris ba futuru.
”Hau hanoin setor produtivu ida nee mak loloos tenke sai baze fundamental ba investimentu estratejiku, neebe sei ofrese solusaun loloos ba problema estrutral neebe ita nia pais infrenta,”dehan Eis Deputadu Virgilio ba STL, iha nia knaar fatin, Segunda (05/05/2025).
Maibe nia hanoin governu liu husi Ministeriu relevante sira presiza investe iha setor produtivu sira atu rezolve situasaun rai laran, no dalan ideal liu mak hasae produsaun hodi responde ba demanda konsumu rai laran hanesan investe ba iha setor agrikultura atu bele hamenus produtu importadu.
Iha parte ketak, Jose da Costa hanesan observador nasional kestiona, governu sempre dehan oinsa tau prioridade atu hasae produsaun rai laran, hodi bele diminui dependensia ba importasaun, maibe realidade aihan importasaun barak mak serkula iha rai laran.
“Hau haree governu la seriu investe iha setor agrikultura no setor produtivu seluk tan, hodi diminui importasaun husi rai liur,” dehan Jose.
Observador nasional nee husu ba governu atu haree liu liu asuntu setor agrikultura no setor produtivu sira seluk, nunee Timor-Leste iha rasik nia prudutu atu labele depende liu ba nasaun seluk.
(car)
