DILI, STLTIMORLESTE.com – Sentru Formasaun Naroman ba Futuru (SFNF) atribui sertifikadu ba formandu lian Ingles ba kandidatu PALM Session Worker neebe ho valor very poor, poor no sufficient hamutuk 61.
“Kandidatu sira neebe tuir formasaun iha Sentru Formasaun Naroman ba Futuru prepara aan didiak, no mos ba Sentru Formasaun Naroman ba Futuru atu kontinua fasilita formasaun lian Ingles ba kandidatu trabalhador sira neebe tuir hela prosesu iha Sekretaria Estadu Formasaun Profisionál no Empregu (SEFOPE),” hatete Diretor Jerál Formasaun Profisional no Empregu Estranjeiru, Carlito do Rosáriu Cabral iha ambitu atribuisaun sertifikadu iha salaun Ahisaun Aimutin, Dili, Kuarta (18/12/2024).
Nia dehan, Sentru Formasaun Naroman ba Futuru bele fasilita formasaun lian ingles ba kandidatu trabalhador sira neebe tuir prosesu iha SEFOPE valor seidauk too atu tama iha sistema, ho formasaun nee bele hadia sira nia valor no kapasidade iha lian Ingles hodi servisu iha rai liur, tuir kriteira ho nesesidade husi empregador Australia fo.
Maske nunee, SEFOPE agradese ba sentru formasaun publiku no privadu sira hotu neebe fasilita ona joven sira.
“SEFOPE agradese ba sentru formasaun publiku no privadu sira hotu neebe fasilita ona ita nia joven sira hodi fo formasaun iha lingua ba ita nia joven sira atu bele kompete servisu iha rai laran no mos rai liur,” tenik nia.
Nia akresenta, depois simu sertifikadu, kandidatu sira idak-idak sei aprezenta sertifikadu iha SEFOPE kada munisipiu sira neebe uluk sira teste ba.
Iha fatin hanesan, reprezentane Prezidente BOR, Mafalda Fernandes Gusmão hatoo agradesimentu profunda ba SEFOPE neebe fo ona oportunidade ba Sentru Fromasaun Naroman ba Futuru, hodi fo ona formasaun no kapasita ona ita nia joven sira.
“Sekretaria Estadu Formasaun Profisionál no Empregu (SEFOPE) fo fiar ida neebe boot tebes mai ami Sentru Formasaun Naroman ba Futuru, atu fo formasaun ba alin sira hodi bele ba kompete servisu iha rai laran no rai liur, ida nee importante tebes, hodi minimiza dezempregu iha ita nia rain,” nia hakotu.
(EST 1)
