BAUKAU, STLTIMORLESTE.com – Relasiona ho informasaun neebe Primeiru Ministru (PM), Kay Rala Xanana Gusmão hatete, sidadaun balu kaer kilat no rama ambon iha Baukau, nee la loos.
“Hanesan Autoridade Seguransa atu klarifika katak la loos, hau la hatene sumber neebe mak fo informasaun nee, tanba durante situasaun iha Baukau lao kontroladu husi loron finadu ate a data,” hatete Komandante Komando Polisia Munisipiu Baukau, Superintendente Xefe Polisia ,Antonio Maria de Sa ba jornalista sira iha Loilubu, Sesta (17/01/2025).
Komandante nee relata, durante implementasaun programa Governu nian iha Munisipiu Baukau lao kontroladu.
Maibe antes nee informasaun espalha Funu Nain FALINTIL Libertasaun Nasional Clementino Cabral “Mautidi Aliansa” mak iha material funu nian hanesan Bom Marotok no kilat, maibe liu husi identifikasaun laiha sasan hirak nee iha nia fatin eis merkadu Vila Nova Baukau.
“Hau rasik ba koalia ho eis FALINTIL Mautidin rasik no membru sira iha terenu buka informasaun maibe ida nee la akontese,” de Sa akresenta
Informasaun neebe PM fo sai rama ambon no kilat iha Baukau, nee konsidera hanesan fo motivasaun ba Polisia no FALINTIL-Forsa Defeza Timor Leste atu garante diak liu tan seguransa iha territoriu nasional hodi prosesu dezenvolvimentu lao ho diak.
Mezmu konsidera informasaun refere lalos, maibe Komando Polisia Munisipiu Baukau sei kontinua koordena operasaun konjunta hodi intensifika liu tan planu operasaun.
(EST 2)
