DILI, STLTIMORLESTE.com – Komandante Munisípiu Dili, Superintendente Xefe Polisia, Orlando Gomes hatete, sidadaun estrajeiru ho naran Richard Gallahad, idade 55, neebe hakotu iis iha apartamentu area Kampung Alor, Polísia Nasional Timor Leste (PNTL) seidauk hatene lo-loos kauza mate tanba saida.
Nia dehan, sidadaun estrajeiru ida husi Inglaterra ho naran Richard Gallahad, idade 55, neebe sai formador lian ingles iha Lorosa’e English Language Institute (LELI) neebe hakotu iis iha apartamentu ida iha area Kampung Alor, agora dadaun iha prosesu investigasaun nia laran.
Nia esplika, horiseik nee matebian nia kolega telefone nia, maibe la foti entaun nia kolega ba nia apartamentu hodi buka tuir, maibe odamatan save hela, depois uma nain nee fo save ba nia kolega nee loke odamatan matebian nee iis laiha ona no latan hela iha simenti leten, no kontaktu kedas mai iha Eskuadra Dom Aleixo hamutuk ho Forensik tun kedas ba fatin akontesimentu no evakua kedas mate isin ba iha Hospital Nasional Guido Valadares (HNGV) hodi halo autópsia.
“Ita seidauk hatene ninia kauza nee mate tanba saida, maibe tuir informasaun husi ninia kolega rasik hatete katak, sidadaun nee baibain konsumu alkohol makaas,” hatete Superintendente Xefe Polísia, Orlando Gomes ba jornalista sira iha KMD Kaikoli, Kuarta (02/04/2025).
Nia esplika, kona-ba ezaminasaun ba fatin akontesimentu nee sei iha prosesu investigasaun, no mate isin agora sei iha prosesu autópsia.
Iha fatin hanesan, Funsionáriu iha Sala Mortuariu HNGV, Mariana Freitas informa, sidadaun estrajeiru mane ida horiseik Polísia Forensik lori mai too agora seidauk autópsia, tanba sei hein karta husi Forensik.
“Ita haree seidauk autópsia tanba sei hein karta husi Forensik, depois mak halo autópsia, sei wanhira autópsia hotu ita entrega ba familia matebian hodi halao nia funerál,” nia afirma.
(jen)
