BAUKAU, STLTIMORLESTE.com – Deskonfia sidadaun ida halo agresaun fiziku hasoru Padre Parokia Santa Terezinha Kelikai, David Savio, SDB iha kartoriu Suku Lakuliu, Postu Administrativu Kelikai, Munisipiu Baukau.
Informasaun nee hatoo husi Administrador Postu Administrativu Kelikai, Paul Jacinto Moreira ba STL liu husi telefone katak, insidente nee akontese iha iha loron 12 Maiu 2025, tuku 10:00 dader.
“Kazu nee nia kronolojia hau seidauk rona, maibe kazu nee mai tiha ona Polisia Eskuadra Kelikai, Padre Parokia nee naran David, nia kakorok mak kanek ho faru nee mak nakles hotu kedas,” informa Administrador Kelikai.
Autoridade Postu nee haktuir, hafoin agresaun fiziku nee akontese, vitima Padre Parokia Santa Terezinha Kelikai David Savio, SDB la aseita atu lori kazu nee ba oin no la autoriza halo kapturasaun ba sidadaun neebe deskonfia halo agresaun fiziku nee, maibe Autoridade Postu Kelikai no entidade seluk iha Postu Kelikai mak lakohi katak, kazu nee tenke aprezenta hodi fo solusaun liu husi dalan justisa.
Nunee Komando Polisia Munisipiu Baukau liu husi ekipa kaer ona sidadaun ida neebe deskofia halo agresaun fiziku hasoru Padre Parokia hodi asegura iha sela Komando Polisia Munisipiu Baukau.
“Hau hanoin kazu nee tenke ba oin, para atetude neebe ita nia sidadaun halo tenke ba oin para nia aprende saida mak nia halo no jerasaun mai labele haree tuir hahalok neebe nia halo,” hateten Administrador Postu Kelikai.
Autoridade Postu Kelikai nee relata, sidadaun neebe deskonfia halo agresaun fiziku hasoru Padre Parokia Santa Terezinha Kelikai, husi Postu Administrativu Matebian, Munisipiu Baukau.
Katekista Parokia Santa Terezinha Kelikai, Mario Funsiano esplika, agresaun fiziku neebe sidadaun refere halo ba Padre Parokia Santa Terezinha Kelikai, tanba kestaun sertidaun nasimentu.
“Nia oan sarani iha fulan Setembru liu ba iha Afasa, nia mai konfirma nia oan nia sertidaun, depois ema neebe iha kartori rai livru asentu nee katuas struk la tama tiha ona servisu, entaun Amu esplika kondisaun ida nee ba nia, maibe dehan la tama nia ulun rasta Amu nia faru,” haktuir Katekista nee ba jornalista sira liu husi telefone.
Entretantu tuir observasaun STL asesu iha resintu Komando Polisia Munisipiu Baukau, sidadaun nee daudaun detein ona iha sela Komando Polisia Munisipiu Baukau, maibe STL seidauk halo koordenasaun ho Komandante Komando Polisia Munisipiu Baukau, tanba sei inkomoda ho serimonia diviza.
(tom)
