BAUKAU, STLTIMORLESTE.com – Familia lori ona matebian Felix Ximenes neebe mate iha Aibubur laran, Aldeia Darasula, Suku Gariuia, Postu Administrativu Baukau Vila, Munisipiu Baukau, nia mate isin ba Hospital Nasional Guido Valadares (HNGV) Dili atu halao autopsia.
Xefe Suku Gariguia, Arlindo Belo haktuir, iha loron Sesta semana kotuk matebian Felix Ximenes hamutuk familia sira ho kareta ba hili ai sunu iha Aibubur laran atu utiliza ba tein iha serimonia funebre ida iha Gariuai no sidadaun refere parte familia la aseita nia atu tun husi kareta, tanba enfrenta moras mental, ho nunee parte familia sira kontinua hili ai sunu too remata atu fila ba uma, maibe haree sidadaun refere laiha ona tur iha kareta oin.
“Nia lakon durante loron neen nia laran. Hodi kalan lori tiha ona mai iha Dili atu autopsia, agora daudaun iha hospital,” Xefe Suku Gariuia Arlindo Belo informa ba jornalista sira liu husi telefone, Kinta (19/03/2026).
Matebian refere lakon durante loron neen (6) iha aibubur laran no parte familia sira buka tuir hafoin hetan nia isin mate iha loron 18 Marsu 2026 oras meudia.
Hafoin buka tuir familia hetan nia mate isin iha Aibubur laran Aldeia Darasula, Suku Gariuia, submete kedas ba prosesu autopsia iha HNGV Dili atu hatene kauza ba insidente refere.
Entretantu matebian Felix Ximenes nuudar profesor neebe antes nee hanorin iha eskola ensinu baziku filial Buruma kuaze tinan naruk no kontinua muda ba eskola ensinu baziku sentral Gariuai hafoin hetan insidente refere.
(tom)
