DILI, STLTIMORLESTE.com – Tribunal Judisial Primeira Instansia Dili liu husi despaixu ikus ba prosesu primeiru interogatoriu, deside aplika medida Aprezentasaun Periodika (AP) ba arguidu ho inisial ADC.
Iha prosesu nee, Ministeriu Publiku promove arguidu mai iha Tribunal ho krime Arma Branka, lei numeru 5/2017.
Halo tiha indentifikasaun ba arguidu, Juiz turnu Jose Maria, deside hodi aplika medida Aprezentasaun Periodika ba arguidu.
Tuir defeza, Laura Valente katak, Tribunal aplika medida Aprezentasaun Periodika ba arguidu, atu aprezenta aan mensalmente iha Eskudra Polisia neebe hela besik ba.
“Iha alegasaun, Ministeriu Publiku husu atu aplika medida Prizaun Preventiva, maibe defeza husu aplika medida Aprezentasaun Periodika, ikus mai Tribunal deside aplika medida Aprezentasaun Periodika ba arguidu,” dehan nia ba STL iha Tribunal Dili, Kuarta (30/04/2025).
Nia hatutan iha alegasaun, defeza husu atu aplika medida Aprezentasaun Periodika, tanba haree ba arguidu hanesan estudante husu atu aplika deit medida nee hodi asegura prosesu investigasaun.
Tuir kronolojia katak, momentu neeba akontese problema ida entre eskola 10 de Dezembru no Finantil Aimutin, tanba nee ba rezolve iha sede suku, momentu neeba rezolve hela problema nee arguidu mos ba hotu, maibe sikat hela tudik ida iha vitima nia kanotak.
Tanba nee, Polisia detein arguidu hodi lori mai iha Tribunal, submete ba iha prosesu primeiru interogatoriu, no ikus mai Tribunal deside aplika medida Aprezentasaun Periodika ba arguidu. Maibe, arguidu la kumpri medida refere hodi ba aprezenta an iha Eskuadra Polisia, ho nunee Ministeriu Publiku husu Tribunal hasai mandadu ida buka tuir arguidu hodi submete hikas mai iha Tribunal hodi halo alterasaun ba medida.
Maibe iha Tribunal arguidu deklara, hanesan estudante liu ona bolsu estudu, tanba nee maka Tribunal deside kontinua aplika medida Aprezentasaun Periodika ba arguidu.
Prosesu nee, prezide husi Juiz Singular, Jose Maria, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensora Publika Laura Valente.
(ter)
