DILI, STLTIMORLESTE.com – Komunidade no maluk vulneravel iha Suku Daudo, Postu Administrativu Kailaco, Munísipiu Bobonaro, neebe simu apoiu umanitaria agradese bá Ministra Solidariedade Sosial no Inkluzaun (MSSI), Veronica das Dores ho nia ekipa neebe halo vizita ba sira.
Tuir Xefe Suku Daudu, Antonino Maria Soares katak, objetivu vizita husi Ministra ho ekipa mai iha Kuarta (18 /02/2026), atu fo apoiu ai han ba maluk vulneravel sira iha suku refere. I alende nee Ministra nee atu hare direita ferik ho katuas no faluk sira bolsa da mae, pois koalia kona ba kriteria idozu no bolsa da mae nian.
“Vizita husi Ministra Veronica das Dores ho ekipa mai iha nee hodi apoiu aihan bá maluk vulneravel, nunee mos hakarak haree direita kondisaun ferik ho katuas no faluk bolsa da mae sira,” dehan nia ba STL liu husi telefone iha Daudu, Kailaco, Kinta (19/02/2026).
Nia dehan, maluk vulneravel sira neebe hetan apoiu nee hamutuk 50. Ho vizita nee rasik halo komunidade iha fatin nee senti kontenti no agradese tebes, tanba hetan vizita nomos apoiu husi membru governante nee. Iha biban nee mos nia rekomenda bá MSSI bele mos halo estensaun ba subsidiu ba labarik sira liuhusi programa bolsa da mãe kondisionál, liu-liu ba labarik sira neebe iha Eskola Sekundáriu, maibe sira nia idade ultrapasa ona 17.
“Ami agradese tebes bá MSSI, tanba Ministra aleinde fo apoiu ai-han oituan, nia mos halo esforsu hodi hasae ona osan subsidiu ba idozu sira. Ami rekomenda mos atu MSSI halo estensaun ba subsídiu ba labarik sira liuhusi Programa Bolsa da Mãe Kondisionál, liuliu ba labarik sira neebe iha Eskola Sekundariu maibe sira-nia idade ultrapasa ona 17 atu kontinua hetan,” rekomenda autoridade lokal nee.
Nia hatutan, antes atu halo vizita mai iha Suku Daudu, Governante nee halo uluk vizita no apoiu aihan ba maluk vulneravel sira iha Suku Raiheu iha Tersa, hafoin iha Kuarta Sinzas depoiz de sai misa, Ministra kontinua vizita kedas maluk vulneravel iha Suku Daudo.
Vizita nee hodi halao distribuisaun apoiu umanitaria ba maluk vulneravel mak hanesan, idozus neebe hanaran erois vivus, ema ho defisiensia, inan isin-rua no inan fo-susu, feto faluk ho oan kiak abandonadu, Ppasiente vulneravel, familia iha sirkunstansia sosial no uma kain kbiit laek.
(dom)
