DILI, STLTIMORLESTE.com – Prezidente Republika (PR), Jose Ramos Horta husu Governu identifika didiak funsionariu ou asesor sira atu simu salariu desimu terseiru labele dupla, tanba dala barak ema ida servisu iha fatin rua ka tolu.
Prezidente Republika Jose Ramos Horta hatoo kestaun nee ba jornalista sira, bainhira remata entrega premiu direitus umanus, Sergio Vieira de Mello edisaun ba da-18 ba vensendor nain neen (6), iha Palasiu Prezidensial Nicolau Lobato, Bairu Pite, Kuarta (10/12/2025).
“Tuir lei asesor sira laos konsideradu funsionariu, porzemplu se mak funsionariu labele simu desimu terseiru mes nee klaru, maibe labele simu dala rua nuudar asesor no nuudar funsionariu, portantu ida nee hau sei haree didiak, Governu tenke haree tanba dala ruma halo sala ema nee simu iha nia servisu rasik no fatin seluk simu desimu terseiru nuudar funsionariu polisia ka militar depois servisu tan fali seluk, simu tan ida nee tenke haree,” dehan Prezidente Republika.
Prezidente Republika hatete, asesor sira simu salariu neebe boot tebes, la hatene simu tan salariu desimu terseiru ka lae? Maibe salariu 13 nee atu ajuda ema neebe kiak maibe asesor sira ho salariu neebe boot.
“Hotu-hotu iha direitu sim, iha direitu ba desimu terseiru, agora asesor sira be manan osan boot hau la hatene iha direitu ka lae? Tanba prinsipiu terseiru mes nee atu ajuda familia sira kiak servisu estadu nee, se o asesor manan US$ 4 mil ka 3 mil nee o la kiak, Prezidente Republika manan US$ 4 mil ital, maibe ida nee kriteria husi Governu hau lamete ba ida nee, buat neebe Governu halo hau tuir deit,” katak PR Horta.
Entaun Palasiu Prezidensial sei la implementa salaiu desimu terseiru ou gaji 13 ba funsionariu kazuais ou asesor sira neebe simu salariu boot ka oinsa? Prezidente dehan nia la hatete ida nee, maibe Prezidente hein deit Governu nia desizaun.
“Hau la dehan hanesan nee, hau dehan hein Governu nia desizaun maibe sira be iha nee bele kazuais maibe kuitadu manan osan kiik, manan osan kiik hau haree mezmu Governu hatete lei la kobre maibe hau sei haree oinsa prezidensia rasik bele fo apoiu ba sira tanba sira kazuais ema manan kiik iha familia, tanba sa mak tenke funsionariu sira deit normal kontratadu ka permanente iha direitu tanba kiak entaun sira seluk laiha, hau sei haree ida nee,” dehan PR Horta.
Foin lalais Sorumutu Konselhu Ministrus loron 3 fulan Dezembru 2025 aprova projetu Dekretu-Lei, neebe aprezenta husi Ministra Finansas, Santina Jose Rodrigues F. Viegas Cardoso, hodi aprova pagamentu estraordinariu salariu adisional fulan ida nian ba Administrasaun Publika.
Diploma ida nee ho objetivu atu garante, durante tinan 2025, pagamentu estraordinariu ba salariu adisional ida, nuudar dalan atu rekonhese kompromisu no dedikasaun trabalhador sira Administrasaun Publika nian no ninia ekiparadu sira. Medida nee manten prinsípiu universalidade, neebe abranje titular kargu publiku sira, funsionarius, ajentes, membru sira husi forsa defeza no seguransa, trabalhador sira neebe vinkula husi Lei Trabalhu nian no kontratadu sira Administrasaun Publika nian, ho exesaun kontratadus estranjeirus.
Pagamentu estraordinariu jeralmente koresponde ba montante salariu neebe simu iha fulan Dezembru 2025. Atu garante uniformidade, montante neebe aloka ba kontratadu sira ekiparadu ho rejime jeral no limita ba grau no eskalaun masimu tabela salarial nian, hanesan kazu funsionarius no ajentes. Diploma nee estabelese mos katak pagamentu estraordinariu nia montante la bele liu salariu Prezidente Republika nian.
Prosesamentu sei halao durante Dezembru 2025, neebe finansia husi verba sira neebe disponivel iha orsamentu husi entidade empregador idak-idak. Iha kazu sira neebe rekursu orsamental sira la sufisiente, pagamentu tenke fo prioridade ba trabalhador sira ho salariu kiik liu, ho montante restu sira neebe asegura liu husi Orsamentu Jeral Estadu nian ba tinan 2026.
Jornalista: Jacinta Sequeira
Editor: Xisto Mendonça
