DILI, STLTIMORLESTE.com – Hela loron deit atu troka tinan tuan 2024, hodi simu tinan foun 2025, tanba nee karik hahalok aat neebe mak halo iha tinan tuan, presiza muda iha tinan foun.
Tuir Onedia Soares hanesan Joven ba Kristu ba STL iha Bairo Pite, Segunda (30/12/2024) hatete, Kosok Oan Jesus moris ona lori dame ba família idak-idak no hela loron ida deit atu simu tinan foun, ho loron foun nee husu atu muda hahalok aat neebe antes nee halo iha tinan tuan.
“Karik iha tinan tuan nakonu ho bosok no hahalok aat violentu, ho tinan foun mai ho fali haraik aan pasiensia obedese, atu nunee moris iha domin no dame nia laran, dame hahu iha familia uma laran too sosiedade,” katak nia.
Nia mos husu ba iha maluk joven sira nafatin sai ezemplu iha sosiedade no hakribi violensia promove unidade dame iha idak-idak nia fatin, tanba nasaun ba oin presiza unidade ho asaun progresu.
“Ohin loron ita hotu haree hanesan Primeiru Ministru no Prezidente Republika José Ramos Horta koalia ona, ohin loron joven sira maduru ona, tanba hatudu ona iha asaun husi vizita Sua Santidade Papa Francisco nia neebe sira hatudu pas no hakmatek tebes no ohin loron mos laiha asaltu malu, maske balun lanu halo violensia maibe laos ho boot, ida nee presiza kontinua ba oin,” katak nia.
Nia hatete, joven neebe mak diak presiza hakbesik aan ba Maromak no bainhira lao sala dalan buka hakribi sala no hatene husu deskulpa no perdaun.
Nunee mos Ministru Komersiu Indutria (MKI) Nino Pereira hatete, iha Natal neebe liu ona joven sira no komunidade hatudu hakmatek unidade, liu-liu joven sira iha bairu bairu kontinua hakmatek kolabora ho autoridade.
Nunee mos Prezidente Republika José Ramos Horta hatoo kongratulasaun ba povu Timor Leste neebe mak hatudu ona maturidade diak iha festa Natal no husu kontinua hatudu pas iha rai laran, nunee povu idak-idak bele halo atividade dame no domin.
(eme)
