DILI, STLTIMORLESTE.com – Singapura dezenvolve hela programa espesifiku liu-liu formasaun ba Funsionariu Publiku sira atu aprende, oinsa bele hadia diak liu tan Servisu Administrasaun Públika iha Timor Leste (TL).
Embaixador Naun Rezidente Singapura nian iha TL, Robin Hu atualiza asuntu nee ba Primeiru Ministru (PM), Kay Rala Xanana Gusmão iha Palasiu Governu, Kinta (14/08/2025).
Programa formasaun espesifiku ida nee integra iha programa formasaun neebe Singapura ho TL estebelese ona dezde tinan 2022 ho naran Programa Ekipa Singapura ka Programa Apoiu ba Prontidaun Aziatiku.
“Hau hasoru malu ona ho Primeiru Ministru, Xanana Gusmão iha fatin oin-oin neebe sempre haksolok atu haree nia. Hau koalia ho Primeiru Ministru kona-ba programa formasaun neebe kontinua aumenta. Ami iha rekursu ida neebe kompetitivu tebes. Ami dezenvolve hela programa formasaun espesifiku ida ba joven sira no mos formasaun ba Funsionariu sira oinsa bele halao diak liu tan servisu iha Administrasaun Publika, neebe ami sei inkorpora iha programa nee,” hatete Robin Hu liu husi nota komunikadu neebe STL asesu husi media GPM.
Diplomata nee esplika, integrasaun programa formasaun ba joven no Funsionariu Publiku sira iha Administrasaun Publika nee bazeia ba pedidu husi Prezidente Republika (PR), José Ramos Horta.
Maibe dezenvolvimentu formasaun neebe Singapura oferese ba Timor Leste sai nuudar programa parseria ida ho Institutu Sudeste Aziátiku nian.
Tanba formasaun nee ho objetivu atu tulun Funsionariu sira komprende oinsa atu lao, oinsa atu prepara aan hodi bele partisipa mos iha assembleia sira Sudeste Aziátiku nian.
Entretantu durante enkontru Primeiru Ministru, Xanana Gusmão agradese ba Singapura neebe bele fornese parseira diak-liu iha servisu polítiku hotu-hotu relasiona ho patrimoniu ba povu.
No Primeiru Ministru mos sente kontente ho atualizasaun espesifiku ida-nee no hein katak programa ida-nee susesu iha tinan 2025 ba oin.
(alb)
