BAUKAU, STLTIMORLESTE.com – Jovem sira neebe atu kompete ba vaga Nova Zelandia iha Munisipiu Baukau sente triste, tanba sistema produz sertifikadu ba vasina Covid-19 nian iha Servisu Munisipal Saude Baukau avaria.
Ba kestaun nee Reprezentante joven Baukau Oan, Anacleto Correia Freitas hateten, vaga neebe daudaun loke iha rai laran no vaga ba rai liur nian presiza mos dokumentu importante ida husi Ministeriu Saude mak hanesan sertifikadu vasina Covid-19 nian, tanba vaga ba Timoroan atu sai trabalhador iha Nova Zelandia daudaun prezisa sertifikadu nee, maibe sistema produz sertifikadu vasina Covid-19 nian iha Servisu Munisipal Saude Baukau avaria.
“Ami joven triste tebes atu apply vaga ruma kona-ba ida nee, dehan sertifikadu covid nian importante. Oinsa ho Ministeriu Saude loke fali sistema ida nee ami mos hetan sertifikadu, se koalia kona-ba kompanhia mak taka nusa Ministeriu la koalia kona ida nee sistema ida nee, maibe tuur iha neeba koalia kona-ba sosa karreta ba deputadu sira,” hateten Anacleto ba jornalista sira, iha Tirilolo, Baukau, Kuarta (10/09/2025).
Jovem nee sente triste, tanba ukun nain sira koalia kona-ba sosa karreta foun ba deputadu sira iha Parlamentu Nasional, maibe la haree problema sira neebe responde direita ba sidadaun sira iha baze liu liu sistema atendimentu publiku nian.
Tanba nee husu Ministeriu Saude no instituisaun relevante seluk fo solusaun ba sistema produz sertifikadu vasina Covid-19 nian, hodi fasilita jovem sira neebe daudaun mehi atu konkore vaga online ba Nova Zelandia nian no vaga seluk tan, neebe presiza mos sertifikadu vasina Covid-19 nian.
“Se bele koalia ho kompanhia nee loke fali sistema ida nee atu ami hetan sertifikadu vasina nian, para ami ba apply vaga laos Nova Zelandia deit, maibe vaga sira seluk agora tama hotu ba sertifikadu covid-19 nian,” Anacleto akresenta.
Iha fatin hanesan Xefe Suku Kaibada, Cosme da Costa Lopez preokupa sistema produz sertifikadu vasina Covid-19 nian iha Servisu Munisipal Saude Baukau, tanba vaga Nova Zelandia neebe anunsiu ba publiku nuudar oportunidade ba jovem Timoroan sira atu konkore hodi ba servisu iha nasaun refere, maibe sistema produz sertifikadu vasina Covid-19 nian avaria.
“Ita husu ba Ministeriu halo kooperasaun diak fali ho kompanhia loke fali sistema, tanba fo prejudika ba jovem sira, agora iha oportunidade ona mais ita rasik mak taka dalan, tanba ida nee ema hotu iha vontade atu reduz dezempregu, maibe sistema taka derepente halo ema hotu la satisfas ho ida nee,” katak Cosme.
Enkuantu Diretor Interinu Servisu Munisipal Saude Baukau Leonel Guterres rekoinhese, sistema produz sertifikadu vasina covid-19 nian iha Servisu Munisipal Saude Baukau avaria, iha loron 09 Setembru 2025 pur-volta tuku 15:00 loraik bainhira ekipa sira halo hela atendimentu.
“Horiseik dia 09 12 oras ba kotuk nee sistema lao normal, tuku tolu balu redi foufoun todan entaun ami koko WiFi ida atu asegura sistema tanba barak la halimar, maibe foin atu print ema nain 3 dala ida sistema taka,” haktuir Leonel.
Hafoin sistema taka nia parte relata kedas asuntu refere ba Nasional, maibe situasaun kuaze hanesan, tanba sistema iha Munisipiu Likisa, Baukau no Sentral kuaze avaria hotu.
Sstema nee avaria fo impaktu ba jovem sira neebe iha vontade atu kompete vaga Nova Zelandia no seluk tan, tanba laiha meius seluk atu fasilita jovem sira hetan sertifikadu vasina Covid-19 nian aliende husi sistema online.
Tanba nee husu parte Nasional atu responde asuntu nee ho emerjensia, tanba vaga ba Nova Zelandia loron ba aplikante sira submete dokumentus limitadu tebes.
Entretantu tuir observasaun jornalistaSTL nian iha terrenu nota katak, daudaun jovem sira neebe prezisa atu trata sertifikadu vasina Covid-19 nian, kontinua hein iha resintu Servisu Munisipal Saude Baukau.
Jornalista: Tomas Reis
Editora: Carme Ximenes
