DILI, STLTIMORLESTE.com – Komandante Polisia Nasional Timor (PNTL) Munisípiu Dili, Superintendente Xefe Polísia, Orlando Gomes hatete, situasan jeral iha loron paskua lao diak tebes iha sidade Dili.
Nia dehan, durante planu operasaun neebe ita halao iha tempu paskua hahu loron 17 too 20 situasaun iha sidade Dili lao diak.
“Ita koloka ita nia seguransa sira ba iha fatin kapela sira, iha parokia sira, nomos ba fatin risku sira, tanba nee mak durante iha semana santa nee situasaun jeralmente lao ho diak,” hatete
Superintendente Xefe Polísia, Orlando ba jornalista sira iha Eskuadra Dom Aleixo, Dili, Segunda (21/04/2025).
Nia esplika, situasaun jeralmente iha sidade Dili tempu paskua nee lao diak tebes-tebes, tanba sarani sira lao ba selebra festa poskua ho paz no dame.
Iha fatin hanesan, Maria Banca dos Santos nuudar komunidade informa, Komando PNTL liu Komando Munisipiu Dili hetan apoiu masimu husi Unidade Espesial Polisia (UEP), Unidade Polisia Fronteira (UPF), Unidade Polísia Martima (UPM) nomos Diresaun Tranzitu Seguransa Rodaviariu Nasional(DTSRN) intervensaun masimu iha Igreja no Kapela sira iha Munisipiu Dili.
“Ita haree PNTL apoiu husi UEP, UPF, UPM nomos DTSRN atu fo segurasa masimu ba sarani neebe misa Sabadu Aleluia Kalan iha Igreja Dom Bosco, Igreja Bekora, Igreja aimutin, Igreja Katedral, nomos kapela sira neebe iha sidade Dili,” nia informa.
Nia afirma, Diresaun Tranzitu Seguransa Rodaviariu ho Seksaun Rezerva Intervensaun Rapida halo seguransa masimu iha Igreja no kapela sira iha area Juridiku Munisípiu Dili hodi asegura seguransa ba sarani Katólika iha Timor Leste, tuir misa lao iha ambiente pás ho dame nia laran.
(tom)
