BAUKAU, STLTIMORLESTE.com – Servisu Munisipal Agua Saneamentu no Ambiente (SM-ASeA) Baukau menus rekursu umanu no fasilidade servisu.
“Atu dehan deit katak rekursu umanus ba servisu Munisipal ida nee menus tebe-tebes, menus fasilidade maibe la hamate ami nia bareira atu servisu,” hateten Diretora SM-ASeA, Norberta da Costa ba jornalista STL iha Vila Nova, Baukau, Kinta (08/05/2025).
Norberta informa, SM-ASeA iha rekursu umanu hamutuk nain 36 kompostu funsionariu publiku nain 11, kazuais 24 no ajente nain 1, nomos iha limpezador neebe koloka iha area Vila Antiga no Vila Nova hamutuk nain 20 kada loron responde ba lixu sira iha sidade Baukau.
Husi rekursu umanu hirak nee, tuir Diretora SM-ASeA nee katak, seidauk sufisiente, tanba Postu foun rua hanesan, Postu Administrativu Kelikai Antigu no Matebian seidauk iha fasilitador fo impaktu ba setor bee moos iha nivel Postu.
“Prioridade 2026 ami planeia ona sei aumenta fasilitador iha Postu foun rua, kompleta mos limpezador Vila Nova no Vila Antiga no merkadu foun hamutuk nain 10 hanesan nee,” Norberta akresenta.
Diretora nee informa, husi funsionariu kazuais hamutuk nain 24, daudaun koloka iha nivel Postu Administrativu sira hanesan Baukau Vila, Baguia, Laga, Kelikai, Venilale no Vemasi, nunee tinan 2026 sei halo tan rekrutmentu hodi kompleta Postu Administrativu foun rua.
Ba Norberta halo rekrutmentu nee importante, tanba atu apoiu servisu nuudar fasilitador iha nivel Postu, hodi fasilita komunidade no lideransa Suku sira atu projete setor bee moos iha nivel Suku, aleinde mos sai membru Asembleia Postu Administrativu (ASPA) hodi identifika planu prioridade Postu nian ba kada tinan.
Kona-ba fasilidade, SM-ASeA rasik daudaun laiha fasilidade hodi ajuda normaliza kanalizasaun bee moos nian iha baze, tanba ekipamentus sira neebe antes iha, daudaun jere husi Bee Timor-Leste, Empreza Publiku (BTL,EP).
“SM-ASeA susar liu hasoru ida nee, tanba bainhira sistema ruma avaria iha komunidade nia leet, susar atu atende, maibe nafatin iha vontade servisu hamutuk ho Patrimoniu Lojistiku apoiu kareta ami bele ajuda komunidade sira,” hakotu Norberta.
(tom)
