LAUTEM, STLTIMORLESTE.com – Servisu Munisipiu Agua Saneamentu no Ambiente (SMASA) iha Lospalos Vila sempre raut lixu iha loron Segunda too Sesta.
“Ita sempre raut lixu iha Segunda too Sesta, hahu husi dader too loraik, lixu sira nee ita rekolha iha Lospalos Vila,” hatete trabalhador iha SMASA, João Pereira ba STL, iha Lospalos Vila, Sabadu (04/01/2025).
Nia esplika, ekipa barak mak sempre rekolha lixu iha Lospalos Vila no loron ida sempre raut moos hotu, tanba lixu ladun barak.
“Ita haree loron ida ita sempre raut hotu, tanba lixu ladun barak hanesan iha Sidade Dili no komunidade iha nee mos hatene moos, sira sempre soe lixu iha nia fatin,” nia dekalra.
Iha fatin hanesan, komunidade Lospalos Vila, Anita Ximenes deklara, sira sempre limpeza iha idak-idak nia uma, tanba hakarak halo prevensaun ba moras dengue nee rasik.
“Ami iha Lospalos Vila sempre halao limpeza iha idak-idak nia uma no ami sempre soe iha lixu fatin, ita haree rasik Lospalos Vila ambiente moos no saudável,” nia afirma.
(jen)
