BAUKAU, STLTIMORLESTE.com – Servisu Ministeriu Obras Publiku (SMOP) Munisipiu Baukau preokupa kondisaun estrada urbana diresaun Vila Antiga ho Vila Nova iha Postu Administrativu Baukau Vila, neebe daudaun difikulta movimentu ema ho transporte.
“Estrada urbana nee ita hotu preokupa, tanba agora kondisaun aat, estrada nee Indonezia nia tempu, tanba nee estrada sira nee kategoria expire ona,” hatete Diretor Servisu Obras Publiku Munisipal, Agostinho Ximenes ba STL iha knaar fatin, Tersa (11/03/2025).
Nia sublina, estrada urbana diresaun Vila Antiga ba Vila Nova reabilita iha tinan 1993 husi Governu Indonezia, neebe utiliza too ohin loron, maibe atual kondisaun aat hodi prejudika movimentu transporte publiku no privadu, tanba iha parte balu kondisaun kuak no grave.
Nia argumenta, relasiona kondisaun estrada urbana iha Postu Baukau Vila neebe oras nee hahu grave, antes nee ekipa tekniku munisipal halo ona levantamentu dadus hamutuk kilometru 23 no relata ona ba nasional atu halo reabilitasaun, maibe seidauk iha informasaun klaru husi ministeriu.
“Informasaun reabilitasaun ita seidauk simu husi nasional, maibe ita haree took, labele promete uluk ba ita nia komunidade, tanba ami hanesan Obras Publiku Munisipal seidauk hetan informasaun klaru,” hateten Agostinho.
Nia katak, relasiona ho kondisaun estrada refere, parte Obras Publiku Munisipal kontinua tenta konfirma parte ministeriu, maibe seidauk iha informasaun klaru kona-ba prosesu reabilitasaun estrada refere. Tanba nee husu entidades hotu iha Munisipiu Baukau atu mantein hein dezisaun husi nivel nasional.
Iha sorin seluk, habitante Canizio Rosario Natividade Fraga argumenta, iha tempu okupasaun Indonezia konsidera Baukau segundu sidade iha Timor Leste, tanba kuaze estrada iha vila laran kaber, maibe hafoin Timor Leste ukun aan, estrada ligasaun Vila Antiga ba Vila Nova liu-liu ba merkadu foun Tuanau, iha tempu udan nakfila sai debu, tanba udan bee nalihun deit iha fatin
“Ita haree estrada iha vila laran kondisaun aat tebes ona, ita ho transporte atu ba merkadu foun difikulta tebes ita, tanba husi bundaran Vila Nova too merkadu foun kuaze estrada la diak ona,” haktuir Canizio.
(EST 1)
