DILI, STLTIMORLESTE.com – Relasiona ho Dirijente Servisu Nasional Intelijensia (SNI) nain 2 neebe hatama fuguetis ilegal, oras nee daudaun prosesu rejista ona iha Ministeriu Publiku (MP).
Tuir Prokurador Jeral Republika, Nelson de Carvalho katak, prosesu SNI nain 2 iha ona MP, no rejista iha Gabinete Kombate Korupsaun.
“Prosesu nee rejista hela iha Gabinete Kombate Korupsaun nian, karik ita boot sira haree buat balu iha neeba hela, ita boot sira haree rasik, hau labele fo komentariu ba ida nee tanba sei iha faze investigasaun,” dehan PJR ba jornalista sira iha Palasiu do Governu, depois de partesipa selebrasaun loron Proklamasaun Independensia Unilateral ba dala-50, Sesta (28/11/2025).
Nia esplika, banhira rejista ona, klaru katak investigasaun sei lao hela.
Iha fatin ketak, Jurista Sergio Dias Quintas dehan, SNI nee instituisaun estadu neebe toma konta ba seguransa publika, entaun ema neebe servisu iha instituisaun refere tenke komporta diak, laos pelo kontrariu.
“Ba elementu SNI nain 2 neebe utiliza kareta estadu hodi hatama fogutis ilegal mai rai laran too aparelu seguransa deskobre ho forma flagrante de delito ka kaer ho liman, devia ema nain 2 nee detein kedas iha sela detensaun tanba pratika krime publiku ho nia tipo de krime kontrabandu previstu iha artigu 316, ka krime deskaminho iha artigu 317 husi Kodigu Penal,” dehan Sergio.
Sergio afirma, pergunta ba ita mak nee, tanba saida polisia la detein imediatu elementu SNI nain rua nee, serake tanba sira tropa ka polisia, karik nee mak ema sivil iha possibilidade bele detein kedas.
Jurista konsidera, tuir loloos detein sira iha sela depois lori ba Tribunal para sujeitu ba primeiru interrogatoriu tuir artigu 217 husi Kodigu Prosesu Penal.
Nunee ida seluk mak SNI tenke foti medida disiplinar ruma ba elementu nain 2 nee, tanba la komporta diak hodi estraga imajen instituisaun, dalan diak liu mak demite sira husi SNI.
Antes nee Komandante PNTL Munisipiu Likisa informa katak, prosesu refere submete ona ba iha Ministeriu Publiku (MP).
Jornalista: Terezinha De Deus
Editor: Xisto Mendonça
