DILI, STLTIMORLESTE.com – Tribunal Judisial Primera Instansia Dili julga arguidu nain rua (2) ho inisial AL no EC, tanba komete krime Danu Agravadu hasoru lezada nain rua (2) JR no MC.
Tuir akuzasaun neebe Juiz Prosesu Jose Maria lee sai katak, iha loron 29 fulan Julhu 2021, iha Tasi-Tolu arguidu sira ba halo estragus lezada sira nia baraka no roupa obralan.
Iha tempu neeba lezada sira faan hela sira nia roupa, derepente deit arguidu AL no arguidu EC ho nia ema sira lori makina eskapator hodi sobu no dudu baraka neebe lezada sira uza hodi faan ropa.
Tuir mai arguidu sira mos lori makina eskapator hodi dudu lezada sira nia baraka no roupa depois tula rai henek no fakar husi leten halo estraga hotu lezada sira kalen, ai, roupa no sasan sira seluk neebe pertense ba lezada sira.
Baraka nee lezada sira lori osan mak sosa kalen, ai, pregu no selu ema hodi harii no sira uza faan ropa durante tinan 7 nia laran, maibe derepente arguidu sira ba sobu no estraga sem fo razaun, no antes nee arguidu sira mos la fo hatene ba lezada sira.
Lezada sira nia sasan neebe arguidu sira estraga mak baraka no roupa obralan neebe sira faan mak hanesan tuir mai, lezada JR baraka ida ho nia valor US$ 250, roupa obralan marka gongon ball ida ho valor US$ 175, roupa ho marka intell ball ida ho valor US$ 200, fatin saneamentu nian ida ho valor US$ 100, ho ida nee total prezuizu neebe lezadu JR hetan US$ 725.
Lezada MC baraka haat, inklui ropa obralan ball haat, hamutuk prejuizu 1540.
Konsekuensia husi arguidu sira nia hahalok nee, lezada JR sofre prejuizu hamutuk, US$ 725, no lezada MC sofre prejuizu hamutuk US$ 1540.
Tanba nee, Ministeriu Publiku akuza arguidu nain rua komete krime Danu Agravadu neebe previstu iha artigu 259 no Danu Simples neebe previstu iha artigu 258 husi Kodigu Penal.
Hatan ba akuzasaun neebe iha, arguidu AL deklara katak, momentu neeba arguidu sira halo ona indemnizasaun, tanba nee mak arguidu sira haruka eskapator hodi hadia rai neebe iha.
Arguidu deklara, momentu neeba laos iha uma kain rua deit, maibe iha uma kain barak mak harii baraka hodi faan ropa, tanba nee arguidu sira bazeia ba lista neebe iha, halo hotu ona indemnizasaun ba uma hirak nee, liu husi oferese rai sira harii uma, nomos ajuda material balu.
Arguidu deklara tan, kona-ba lezada nain rua arguidu la hatene, se sira nia naran laiha lista tanba sira mak fo fali rai ba ema aluga hodi halo baraka, ida nee arguidu sira la hatene, tanba arguidu sira selu ba ema sira neebe harii baraka, laos selu ba ema neebe fo aluga rai ba ema hodi harii baraka, tanba arguidu sira mak nain ba rai.
Nunee, kona-ba ema hirak neebe arguidu sira halo ona indemnizasaun too agora laiha ida mak reklama.
Rona tiha deklarasaun neebe iha, Tribunal adia hikas ba loron seluk hodi rona deklarasaun husi parte sira seluk.
Audensia Julgamentu nee prezide husi Juiz Koletivu, Ersilia de Jesus, Jose Maria, Ana Paula, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Juvinal Dias.
(ter)
