DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho naran inisial FPC ho APC, tanba deskonfia kuda ai katapan ho amere fuik iha lezadu EC nia rai.
Iha sala julgamentu laran, Juiz singular Ivan Suritai lee sai akuzasaun katak, iha loron 25 fulan Julhu tinan 2023, maizumenus tuku 15, iha fatin Bekusi Kraik, Bekora Dili, arguidu sira kuda ai horis hanesan katapan, amere fuik tama ba iha lezadu EC nia rai.
Lezadu sosa rai husi Jose Moli Naha iha tinan 1984 neebe iha tempu Indonezia diresaun agraria tau ona estakamentu baliza, maibe arguidu sira ba hasai hodi kuda aihoris tama too nia rai.
Lezadu nia rai baliza ho Abel Fatima, Laura Silva no Lay Seng Yeng, maibe nia la halo moru so harii deit estakamentu baliza.
Konsekuensia husi arguidu sira nia asaun nee, lezadu nia estakamentu laiha ona no arguidu sira kuda ai horis tama ba iha nia rain.
Arguidu sira hatene katak banhira hasai estakamentu baliza hodi kuda ai horis tama ba nia rai nee proibidu tuir lei, maibe sira halo nafatin.
Arguidu sira halo krimi ho livre deliberada konsentemente no hatene Katak hahalok nee lei bandu no kastigu tuir rei.
Arguidu sira hanesan ko-auto material ba konkursu krimi dano simples no krimi alterasaun ba marka iha artigu 262 husi Kodigu Penal.
Hatan ba akuzasaun neebe iha, arguidu sira nega ba faktus, arguidu FPC deklara katak, iha momentu neeba arguidu sira la kuda ai katapan ho amere fuik iha lezadu nia rai, maibe ai sira nee moris rasik, ai katapan ho amere fuik moris laos iha lezadu nia rai, maibe iha arguidu sira nia rai.
Arguidu APC mos deklara, ai katapan ho amere fuik nee laos arguidu sira mak kuda, maibe nain moris rasik mos laos iha lezadu nia rai, ai sira nee moris iha arguidu sira nia rai.
Lezadu dehan, arguidu sira sobu destaka neebe antes nee tau ona.
Iha alegasaun Ministeiru publiku (MP) Renato Bere Nahak deklara, arguidu sira dehan ai katapan amere fuik nee laos arguidu sira mak kuda, maibe moris rasik no moris mos iha arguidu sira nia rai. Entertantu lezadu dehan agraria tau estakamentu baliza arguidu sira sobu, maibe husi foto grafia laiha, neebe husu ba Tribunal mak atu deside hodi aplika desizaun ida.
Parte defeza husu ba Tribunal atu absolve arguidu sira husi akuzasaun.
Tribunal rona tiha parte rua, Tribunal Adia fali ba loron seluk atu rona desizaun.
Audensia julgamentu nee prezide husi Juiz Singular Ivan Suritai, Ministeriu Publiku reprezenta husi Prokurador Renato Bere Nahak, arguidu sira hetan asistensia legal husi Defensor Publiku.
(ter)
