DILI, STLTIMORLESTE.com – Prezidente Republika (PR), Jose Ramos Horta hatete, atitude husi Sekretariu Estadu Asuntu Toponomia no Organizasaun Urbana (SEATOU), Germano Santa Brites Dias sobu stand iha Palasiu Prezidensial oin, hodi komemora feira natal nee hatudu arogansia.
“Atitude SEATOU nian ida nee hatudu arogansia, ida nee Primeiru Ministru, Kay Rala Xanana Gusmao mak koalia ba ida nee no Primeiru Ministru mak hatene liga ho nia,” dehan PR, Horta ba Jornalista sira,iha Tribunal Distrital Dili, Sesta (19/12/2025).
Publiku kestiona Prezidente Republika ema numeru um maibe SEATOU tun sobu direita oinsa Prezidente nia haree ba ida nee hatan ba kestaun nee Prezidente Republika hatete, Expo nee halo hamutuk ho Munisipiu Dili, no Munisipiu Dili mak haree jardim, haree fatin sira nee laos SEATOU mak ba haree hotu.
Tanba feira hanesan nee laos foin halo maibe tinan hirak nee halo iha tempu natal anima ho komunidade sira no harii mos husi Governu.Feira oin oin mos Governu rasik halo hanesan mos iha 28 Novembru iha Palasiu Governu oin no feira oin oin Prezidente rasik la haree SEATOU tun sobu.
“Aktu nee hatudu arogansia boot, iha vida politika hau hatete bebeik hau halo komnerensia iha liur kona-ba lideransa hau hatete bebeik, o kuandu iha poder iha leten buka tun mai kraik ho umildade tanba politiko lubuk ida inkluidu ita nia rai nee 25 anos hatudu arogansia no monu,” dehan PR, Horta.
Ho attitude SEATOU nian nee Prezidente Republika haruka ona karta ruma ba Primeiru Ministru ka oinsa, hatan ba kestaun nee Prezidente Horta dehan, hein deit husi Primeiru Ministru mak halo desizaun ruma.
Entretantu foin lalais SEATOU sobu Stand neebe negosiante sira monta iha Palasiu Prezidensial oin, tanba ho razaun katak okupa espasu publiku no hamosu engramentu maibe iha meudia Prezidente Republika, Jose Ramos Horta fo orientasaun ba Ekipa Prezidensia Republika ho Prezidente Munisipiu Dili haruka negosiante sira monta hikas stand iha Palasiu oin, no feira nee objetivu atu komemora loron boot Natal no Eroina sira nia.
Jornalista: Emerenciana Pinto
Editora: Carme Ximenes
