DILI, STLTIMORLESTE.com – Ministeriu Publiku (MP) iha nia alegasaun ba krimi infantisidiu, solisita ba iha Tribunal Koletivu atu koondena arguida ho inisial MJ pena prizaun tinan 4.
Iha alegasaun Kuarta nee, Prokurador Prosesu Pedro Baptista konsidera katak, faktus neebe iha akuzasaun provadu duni katak, arguida komete duni krimi neebe Ministeriu Publiku akuza ba.
MP konsidera katak, aktu neebe arguida halo prienxe duni krimi infantesidiu, tanba nee MP mantein ho akuzasaun neebe iha, solisita ba iha Tribunal Koletivu atu kondena arguida ho inisial MJ pena prizaun tinan 4 efetivu.
Enkuantu husi parte Defeza, Defensor Publiku Sergio Dias Quintas solisita ba Tribunal atu absolve arguida husi krimi refere. Defeza konsidera iha altura neeba bebe moris mai arguida rasik mos monu iha haris fatin kuaze minutu balu nia laran foin hakfodak.
No defeza deskonfia, banhira bebe moris mai arguida monu bebe mos monu ba iha simente, iha posibilidade bebe lakon vida tanba pankada husi semente, no kakorok mos bele kona balde, tanba balde ida iha hela haris fatin.
Defeza konsidera, meius provas neebe MP akuza hodi husu Tribunal aplika pena efetivu tinan 4 ba arguida, tanba deit haree ba relatoriu mediku dehan katak, bebe nia kakorok mean hela, no deskonfia dehan arguida mak buti. Maibe iha akuzasaun MP dehan katak, arguida no bebe monu iha simente no arguida lakon konsiensia minutu balu nia laran.
Defeza deklara, prinsipiu In Dubio Pro Reu nee kuandu Juiz duvidas, desizaun tenke favorese ba arguida, katak arguida tenke hetan absolvisaun, ho nunee iha alegasaun defeza husu Tribunal absolve arguida.
Rona tiha alegasaun, Tribunal adia hikas ba loron seluk hodi rona desizaun.
Tuir akuzasaun husi Ministeriu Publiku katak, iha tinan 2022, haleu oras tuku 12h meu dia, iha Dili laran arguida MJ partus bebe mane ida iha haris fatin laran no bebe moris mai la tanis.
Nunee arguida foti hodi kous, tanba arguida oin nakukun no lakon konsiensia entaun arguida ho bebe monu iha haris fatin laran.
Maibe liu tiha minutu balu arguida hetan fali nia konsiensia, nunee arguida falun tiha bebe ho hena hodi koloka tiha iha plastiku ida, no tau tiha iha fatin lixu uma nian, no arguida rasik mak hamoos tiha nia raan partus nian iha haris fatin laran.
Iha loron hanesan, iha oras tuku 19h kalan, mak arguida rasik lori bebe hodi lori ba soe iha lixu fatin ida iha Dili laran.
Bainhira komunidade hetan tiha bebe iha momentu neeba, mak arguida fo hatene ba nia maun katak bebe nee arguida nia oan, no arguida haruka nia maun ba iha hospital hodi fo hatene ba Polisia.
Arguida durante gravida la fo hatene familia sira neebe mak hela hamutuk iha uma, no arguida partus mesak tanba momentu neeba ema sai hotu husi uma ba halao atividade sira.
Arguida moris hamutuk duni ho arguida nia namoradu, no durante arguida gravida la fo hatene ba arguida nia namoradu, no arguida nia namoradu la konvense arguida para komete krimi nee.
Konsekuensia husi arguida nia konduta nee, rezulta vitima lakon vida.
Arguida halo hahalok ho forma konsiente, livre, deliverada, hatene katak banhira partus tiha, depois koloka vitima nuudar nia oan rasik iha plastiku laran hodi soe ba iha lixu fatin nee hanesan meius ida para hakarak oho nia oan, no arguida hakarak duni rezultadu ida nee.
Arguida hatene katak, hahalok nee lei bandu no sei hetan kastigu tuir lei, maibe arguida hakarak halo nafatin.
Tanba nee, konstitui arguida MJ nuudar autor material ho forma konsumadu, pratika krime ida infantisidiu neebe previstu iha artigu 142 husi Kodigu Penal.
Audensia julgamentu nee, prezide husi Juiz Koletivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Sergio Dias Quintas.
(ter)
