DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial RBH neebe komete krimi utilizasaun arma proibida nomos Ofensas Integridade Fizika.
Tuir akuzasaun neebe Juiz prosesu Jose Quintao lee sai iha loron Kuarta nee katak, iha loron 19 fulan Agostu 2022 kalan, organizasaun PSHT halao hela serimonia graduasaun ba nia membru iha eskola 30 de Agostu, Komoro.
Tanba nee lezadu NS ho LCG neebe hanesan membri PNTL hamutuk ho sira nian kolega sira seluk halo seguransa hodi asegura membru arte marsial sira neebe halao sira nian atividade.
Derrepente arguidu RBH ho nian maluk sira neebe foin tuir graduasaun PSHT mosu ba ho motorizada, tebe kedas lezadu NS nian liman hafoin ho motorizada halai liu tiha.
Nune lezadu LCG ba ajuda nia kolega lezadu NS duni tuir Alarguidu atu kaer, maibe arguidu hodi bomba molotov tuda ba lezadu sira hafoin bomba molotov nakfera kona iha lezadu LCG nian ain parte karük no kona mos lezadu NS nian liman parte karuk rezulta kanek no raan, no arguidu halai hodi soe nia motorizada iha lokal.
Konsekuensia husi arguidu nian hahalok rezulta lezadu NS nia liman parte karuk hetan kanek no raan no lezadu LCG nian ain parte karuk hetan kanek no raan, nunee lezadu nain 2 halo tratamentu mediku.
Arguidu RBH komete krimi nee ho voluntaria, livre no konsientemente, arguidu aktua ho forma deskrita, hatene katak bomba molotov nuudar arma de fogo explozivu, wainhira uza hodi soe ba lezadu sira bele halo lezadu sira kanek maibe arguidu sira halo nafatin hodi kontra lei.
Arguidu RBH nuudar autoria material ba konkursu krimi utilizasaun ba arma proibida no mos ofensas ba integridade Fizika neebe tuir artigu 211 no 1450 konjuga ho artigu 350 hotu-hotu husi husi Kodigu Penal.
Iha sala julgamentu laran arguidu deklara katak, momentu neeba Polisia Nasional Timor Leste (PNTL) ba halo seguransa hodi asegura membri arte marsial nian atividade.
Momentu neeba arguidu iha duni fatin problema nee maibe arguidu hamriik 5 metru husi fatin problema nee.
Arguidu deklara, momentu problema nee ema barak no kona-ba bomba molotof nee arguidu la hatene. Ema soe bomba molotov arguidu mos dada nia alin feto nia liman halai ba eskola 30 nia kotuk.
Sasin AC mos deklara ba tribunal katak, iha momentu neeba sasin ho nia membru halo seguransa hodi assegura membru arte marsial nian atividade.
Momentu problema nee suspeitu lo-loos sira la kaer no se mak lori bomba molotov no mos sira la haree. Maibe problema nee ema halai hotu, motor ida mak para hela nain laiha ho nunee sira hanoin suspeitu mak halai husik nia motor ho nunee dadersan mak sira ba kaer arguidu iha nia rezidensia Kakaulidun.
Sasin deklara tan, iha momentu neeba rona deklarasaun husi memburu nain rua NS ho LC no inklui xefe nia deklarasaun.
Lezadu LCG mos deklara ba tribunal katak, iha momentu neeba arguidu lori motor tula nia kolega ida iha kotuk, depois nia kolega ida iha kotuk tun halo agresaun ba kolega polisia ida ho nunee lezadu ba ajuda nia kolega nee silu arguidu nia kolega nia liman sorin ba kotuk, liman ida nia tau ba nia faru laran.
Lezadu mos deklara tan, nia la hetan se mak lori bomba molotof no soe nee.
Rona tiha deklarasaun husi arguidu no sasin sira tribunal adia fali ba dia 02/04/24, tuku 14:30 loraik kontinua rona sasin.
Audensia julgamentu nee preside husi Juiz koletivu Jose Quintao, Jumiaty Freitas Jose Gonsalves Ministeiru Publiku reprezenta Prokurador Domingos Barreto, arguidu hetan asistensia legal husi Defensor publiku, Manuel Amaral.
(ter)
