DILI, STLTIMORLESTE.com – Ministeriu Publiku iha nia alegasaun ba krimi Ofensa ba Integridade Fizika Neglijente, solisita ba iha Tribunal Singular atu kondena arguidu ho inisial AS, tanba konduz karreta soke lezadu AR nia ain loos hetan tohar.
Iha alegasaun loron Kinta nee, Prokurador Hernani Rangel deklara katak, arguidu konfesa ba faktus, momentu neeba arguidu la haree lezadu no lezadu kondisaun lanu. Prokurador haree arguidu konfesa ba faktus, arguidu mos rekonhese konduz karreta la iha karta kondusaun, tanba nee Ministeriu Publiku kontinua mantein ho akuzasaun neebe iha.
Atu halo prevensaun iha futuru, Ministeriu Publiku husu ba iha Tribunal atu aplika pena prizaun tinan 1 suspende tinan 3 ba arguidu. Ministeriu Publiku mos husu arguidu atu selu gastu neebe lezadu gasta ona ba halo tratamentu ba nia ain, no mos motor neebe aat. Se la fo indemnizasaun, sei kumpri pena neebe Prokurador husu.
Husi parte defeza nian haree katak, momentu akontese asidente laos arguidu deit mak la iha karta kondusaun, maibe lezadu mos. Tanba nee defeza konsidera, tuir lo-loos sira nain rua idak-idak responsável ba nia aktu, ho nunee defeza konsidera la prienxe krimi neebe iha husu Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Tuir akuzasaun katak, iha loron 18 fulan Fevereru tinan 2023, iha Matadoru, Dili, maizumenus tuku 10 kalan, momentu neeba arguidu konduz karreta auto movel ho xapa matrikula 24.029 TLS kor mean halai husi Diresaun Matadoru atu ba Balide.
Arguidu konduz karreta too iha Balide Eskola nu. 4 Setembru, arguidu mos ultrapasa motor ida halai hela iha estrada oin, tanba nee arguidu mos la ho kuidadu atensaun haree ba oin.
Bainhira arguidu ultrapasa lezadu mos konduz hela motor ida halai ba iha diresaun Balide nian, nunee arguidu halai ho velosidade makaas hodi soke lezadu iha estrada klaran, tanba arguidu ultrapasa liu ona dalan lezadu nian, no arguidu soke lezadu iha parte karuk dalan lezadu nian.
Akontese tiha polisia halo kedan pasa revista ba arguidu, no deteta arguidu la iha karta kondusaun, bainhira konduz kareta iha dalan publiku.
Konsekuensia husi asidente nee lezadu hetan tohar iha ain los no rekopera fali ona, tanba hetan kura ho aimoruk tradisional, lezadu mos gasta osan US$ 250.00.
Arguidu la ho kuidadu bainhira konduz karreta iha dalan publiku hodi rezulta asidente, lezadu hetan tohar iha ain los, no arguidu mos la iha karta kondusaun tuir lei haruka.
Tanba nee, Ministeriu Publiku akuza arguidu komete krimi Ofensa ba Integridade Fizika Neglijente neebe previstu iha artigu 148 no krimi kondusaun sem karta tuir artigu 207 husi Kodigu Penal.
Hatan ba akuzasaun nee, arguidu konfesa katak, momentu neeba lezadu kondisaun lanu, halai la tuir dalan neebe iha.
Lezadu deklara fali, lezadu la kondisaun lanu, maibe arguidu mak halai ho velosidade makaas hodi soke lezadu.
Audensia julgamentu nee prezide husi Juiz Singular Jose Escurial, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Manuel Exposto.
(ter)
