DILI, STLTIMORLESTE.com – Tribunal Judisial Primeira Instansia Dili liu husi desizaun ikus deside aplika pena multa ba arguidu ho inisial AO, tanba konsidera provadu komete krimi Ofensa Integridade Fizika Neglijente, hasoru lezadu ho inisial AR.
Iha sala julgamentu laran loron Kinta nee, Juiz prosesu Jose Escurial deklara katak, provadu arguidu komete krimi Ofensa Integridade Fizika Neglijente no krimi sem karta kondusaun.
Juiz deklara, iha sala julgamentu laran arguidu konfesa ba faktus, katak arguidu konduz kareta soke duni lezadu, no arguidu rekonhese laiha karta kondusaun.
Tribunal tetu sirkunstansia hotu, no haree katak arguidu foin primera vez mai iha Tribunal, no arepende ba hahalok neebe iha, ikus mai Juiz deside aplika pena multa US$ 60 ba arguidu, Tribunal mos deklara kuandu arguidu la selu pena multa, arguidu sei kumpri pena alternativa durante loron 40 iha Prizaun.
Tribunal mos husu arguidu atu selu indemnizasaun ba lezadu, tanba durante lezadu nia taratamentu ba nia ain gastu osan hamutuk US$ 250 hodi sosa aimoruk ba tratamentu lezadu nia ain. Kona-ba lezadu nia motor neebe hetan estragus, Tribunal la deside atu arguidu hadia, tanba lezadu mos momentu neeba konduz motor sem karta kondusaun.
Tribunal mos husu atu parte Ministeriu Publiku no defeza la konkorda bele halo rekursu ba iha Tribunal Rekursu durante loron 30 nia laran hasoru desizaun neebe Tribunal foti.
Antes nee iha alegasaun Prokurador Hernani Rangel deklara katak, arguidu konfesa ba faktus momentu neeba arguidu la haree lezadu no lezadu kondisaun lanu.
Prokurador haree arguidu mos rekonhese konduz kareta laiha karta kondusaun, tanba nee MP kontinua mantein ho akuzasaun neebe iha.
Atu halo prevensaun iha futuru, MP husu ba iha Tribunal atu aplika pena prizaun tinan 1 suspende tinan 3 ba arguidu. MP mos husu arguidu atu selu gastu neebe lezadu gasta ona ba halo tratamentu ba nia ain no mos motor neebe aat, se la fo indemnizasaun sei kumpri pena neebe Prokurador husu.
Husi parte defeza nian haree katak, momentu akontese asidente laos arguidu deit mak laiha karta kondusaun, maibe lezadu mos. Tanba nee defeza konsidera, tuir lo-loos sira nain rua idak-idak responsável ba nia aktu, ho nunee defeza konsidera la prienxe krimi neebe iha husu Tribunal atu absolve arguidu.
Tuir akuzasaun katak, iha loron 18 fulan Fevereiru tinan 2023, iha Matadoru, Dili, maizumenus tuku 10 kalan, momentu neeba arguidu konduz kareta auto movel ho xapa matrikula 24.029 TLS, kor mean, halai husi Diresaun Matadoru atu ba Balide.
Arguidu konduz kareta too iha Balide eskola 4 de Setembru, arguidu mos ultrapasa motor ida halai hela iha estrada oin, tanba nee arguidu mos la ho kuidadu atensaun haree ba oin.
Bainhira arguidu ultrapasa lezadu mos konduz hela motor ida halai ba iha diresaun Balide nian, nunee arguidu halai ho velosidade makaas hodi soke lezadu iha estrada klaran, tanba arguidu ultrapasa liu ona dalan lezadu nian, no arguidu soke lezadu iha parte karuk dalan lezadu nian.
Akontese tiha Polisia halo kedan pasa revista ba arguidu, no deteta arguidu laiha karta kondusaun bainhira konduz kareta iha dalan publiku.
Konsekuensia husi asidente nee lezadu hetan tohar iha ain los no rekopera fali ona, tanba hetan kura ho aimoruk tradisional, lezadu mos gasta osan US$ 250.00.
Arguidu la ho kuidadu bainhira konduz kareta iha dalan publiku hodi rezulta asidente, lezadu hetan tohar iha ain los, arguidu mos la iha karta kondusaun tuir lei haruka.
Tanba nee, Ministeriu Publiku akuza arguidu komete krimi Ofensa ba Integridade Fizika Neglijente neebe previstu iha artigu 148 no krimi kondusaun sem karta tuir artigu 207 husi Kodigu Penal.
Hatan ba akuzasaun nee arguidu konfesa katak, momentu neeba lezadu kondisaun lanu, halai la tuir dalan neebe iha.
Lezadu deklara fali, lezadu la kondisaun lanu, maibe arguidu mak halai ho velosidade makaas hodi soke lezadu.
Audensia julgamentu nee prezide husi Juiz Singular Jose Escurial, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Manuel Exposto.
(ter)
