DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial TOS hanesan membru FALINTIL- Forsa Defeza Timor Leste (F-FDTL), tanba komete krimi Omisidiu Neglijente neebe previstu iha artigu 140 husi Kodigu Penal.
Iha sala julgamentu laran loron Segunda, Juiz prosesu Fransisca Cabral lee sai akuzasaun katak,
hatan ba akuzasaun neebe iha arguidu konfesa imparsial ba faktus. Arguidu deklara iha asidente nee lezada mate ona, no arguidu fo osan US$ 5 mil no karau ida ba iha lezada nia familia sira hodi hakoi lezada tuir kultura neebe iha.
Arguidu deklara, arguidu ho lezada nia familia sira diak malu hela no la iha problema.
Haree arguidu konfesa imparsial sem rezerva, Tribunal husu ba iha Ministeriu Publiku atu tama ba iha alegasaun. Iha alegasaun nee Prokurador Hernani Rangel deklara katak, arguidu konduz motor la ho kuidadu mak ikus mai kauza lezada mate. Prokurador konsidera faktus neebe iha prienxe elementu krimi Omisidiu Neglijente, tanba nee Prokurador husu Tribunal atu kondena arguidu pena prizaun tinan 1 suspende ba tinan 2.
Prokurador mos husu ba Tribunal atu desizaun Tribunal nian sai haruka mos ba iha arguidu nia superior hodi fo samada ba arguidu atu utiliza motorizada ho kuidadu.
Enkuantu husi parte defeza Manuel Exposto husu Tribunal tetu sirkunstansia hotu, tanba arguidu foin primeira vez mai iha Tribunal, konfesa imparsial, husu Tribunal atu aplika pena multa ba arguidu.
Rona tiha alegasaun, Tribunal adia ba loron 28 fulan Fevereru hodi rona desizaun.
Audensia julgamentu nee prezinde husi Juiz Singular Fransisca Cabral, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Manuel Exposto.
(ter)
