DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ba iha prosesu sumariu, deside hodi aplika pena prizaun tinan 3 suspende tinan 4 ba arguidu ho inisial MSC.
Arguidu lori ba iha Tribunal, tanba konduz motorizada hodi soke Zezelma Maria Fatima Verdial Gonsalves, iha Zebra Kros loja Funan Buras nia oin.
Arguidu submete ba iha prosesu sumariu, neebe prezide husi Juiz Jose Gonsalves, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Advogadu Privadu.
Iha desizaun ba prosesu nee, juiz deside hodi aplika pena prizaun tinan 3 suspende ba tinan 4 no osan rihun US$ 5, maibe familia sira la aseita ho desizaun nee, hodi halo protestu katak, sira buka justisa.
“Ami presiza justisa, juiz mak atu estraga ami, juiz mak ke ami atu oho malu fali, soke hau nia oan iha zebra kros juiz la koalia dehan la sala, juiz dehan nee dezastre, motor soke hau nia oan uza plat seluk nian, falsifika dokumentus juiz sira la tetu ida nee,” dehan vitima nia aman, Jaime Do Rego Gonsalves ba jornalista sira iha Tribunal Dili, Sesta loraik (28/03/2025).
Nia hatutan, nia iha oan mane nain 4 no ida neebe mate hanesan oan feto mesak no ikun, no hakarak ba iha uma mutin nee atu buka justisa no husu juiz sira atu fo justisa neebe loos.
Matebian nia aman dehan, husu mos ba iha Parlamentu Nasional atu harii justisa nee los ka lae? atu hadia lei nee, atu tetu lei nee loos ka lae?.
Iha fatin hanesan, Asistente Eustaquio Guterres deklara katak, Prosesu krimi nain ba prosesu mak Ministeriu Publiku, maibe tuir regra neebe iha, defensor ka advogadu bele husu sai asistente ba prosesu sira, ba prosesu ida nee familia matebian sira husu, tanba nee nia hatama pedidu mai Tribunal no Tribunal aseita hodi sai asistente ba prosesu refere.
“Prosesu nee prosesu sumariu nia desizaun Tribunal aplika pena prizaun tinan 3, suspende ba tinan 4, hau akompanha Ministeriu Publiku hau la aseita ho desizaun nee, hau sei hatoo rekursu ba prosesu refere,” ehan nia.
Nia hatutan, antes alegasaun nia la akompanha, iha desizaun mak akompanha, tanba nee sei hatoo rekursu.
Mezmu nunee, tuir informasaun neebe iha katak, iha loron 13 fulan Marsu nee, matebian ba iha Delta 3 foti faru atu tuir orientasi, tanba matebian foin remata nia eskola SMA no naran sai iha Universidade Nasional Timor Lorosae (UNTL) atu halao estudu iha neeba. Momentu neeba matebian atu fila ba uma, iha Zebra Kroz besik loja Funan Buras nia oin, motor halai mai hodi soke vitima too ikus la salva vida. Vitima hanesan oan feto mesak no ikun, iha maun alin hamutuk nain 4 mesak mane hotu, matebian lakon vida ho idade tinan 17.
Tuir observasaun STL nian iha Tribunal Dili, depois Juiz lee sai desizaun, mosu kedan dezentendimentu husi familia no matebian nia kolega sira, halo barulhu iha Tribunal oin hodi hakilar, la aseita ho desizaun nee.
Husi sira nia emosaun hakilar makaas, no ikus mai rezulta mos ema nain ida neebe monu tun ho raan, hodi evakua kedan ba iha hospital. Maske familia barak ho emosaun hakilar, maibe autoridade seguransa nafatin kontrola, hodi la kontinua akontese situasaun grave iha fatin neeba.
(ter)
