DILI, STLTIMORLESTE.com – Igreja universal selebra solenidade São José Esposo da Virgem Maria no Ordenasaun Diakonal ba Frater nain 5, Frei Aleixo Meni Elo, Fr Floriano Ximenes Belo, OFM, Fr. Hermenegildo Gomes Soares, Fr. Norberto Domingos Tilman Carlos Lopes no Frei Tiago de Jesus Pereira, OFM.
Iha solenidade ida nee, Arkedioseze Metropolitana Dili selebra mos decimo aniversariu Ordenasaun Episcopal, Dom Virgilio Cardeal do Carmo da Silva, SDB.
“Ohin iha solenidade São José Esposo da Virgem Santa Maria ita kontinua esperiensia Maromak ninia domin hodi kontinua bolu fihir no konsagra foin sae nain lima neebe tur dadaun iha ita oin, foin daudaun hatan ona sira nia sim atu haburas nafatin Maromak nia domin iha rai,” hatete Arsebispu Metropolitana Dili, Dom Virgilio Cardeal do Carmo da Silva, SDB liu husi nia omilia, wainhira prezide misa iha Igreja Katedral, Kinta (19/3/2026).
Dom Virgilio hatete, Frater nain 5 nia zenorijidade mak hatudu jestu konkretu obrigadu ba Maromak no kontinua harohan atu liu husi São José nia intersesaun, Igreja Timor sai nafatin viveiro vokasaun nia ba konsagru konsagrada ba uma Kreda universal, São Jose kuda fini vokasaun nian iha foin sae sira nia fuan.
Selebra Festa São José ho joven sira estudante, atu nunee saran sira ba São Jose atu bele hakiak sira nia fuan, basa vokasaun sai sarani neebe diak hili vokasaun uma kreda nian.
Bibi Atan Uma Kreda hatete, solenidade loron ohin nian konvida ema hotu atu haree papel São Jose nuudar Virgem Santa Maria nia kaben, tanba São José ema neebe haraik aan simu Maromak nia proposta ho laran manas tau matan ba Maromak oan no nia Inan ho domin no dedikasaun tomak.
São Jose Santo ida neebe la koalia, nia nonok laos audensia ida iha hanoin, maibe espasu ida iha nia kominaun klean ho Maromak, situasaun nee permite nia atu hatene rona no kompriende Maromak nia planu, maske iha mehi, Sao José ema justu Judeu ida neebe hatoman aan ho orasaun sira iha pratika bele dehan nia moris tomak iha orasaun konstante.
Iha fatin hanesan, Diakonu Aleixo Meni Elo hatete, iha biblia la deskreve São José nia moris, maibe São Jose deskreve buat barak liu husi testemunha da vida.
São Jose ema obedese humilde no simples husi atetude no vertude hirak nee Maromak fihir nia hodi sai kolaborador Maromak nian, hodi kolabora planu salvasaun Maromak nia liu husi abertura hodi rona no halo tuir Maromak nia vontade, ikus bele rekolha nuudar Maria nia kaben.
“Hodi diakonu nain 5 nia fatin hakarak manifesta deit ami nia gratidaun ba domin no grasa vokasaun neebe ami simu ona, ami hakarak agradese ba Maromak nuudar we matan grasa nian, sempre akompanha ilumina ami, hakbiit iha prosesu formasaun nian too ohin loron.
“Hau sei tuir ita ba fatin hotu neebe Ita atu ba,” (Mateus 8.19).
Nia dehan, ida nee hanesan komprimisiu ida iha neebe ezije ami nia boa vontade no protidaun hodi husik buat hotu atu lao tuir Jesus.
Fr. Aleixo Meni Elo, moris iha Tumin Oe-silo, Oecusse iha loron 9, fulan Agosto 1994, oan husi Câncio Auni no Rofina Tasenab Metan (matebian).
Fr. Aleixo, oan datolu husi maun alin no feton nain hitu 7, mak hanesan, Angela Maria Getrudis Elo, Patrícia Elo, Aleixo Meni Elo, Serafino Elo, Juliana Neno Elo, Wilfrida Elo, Marcos Elo.
Frei Floriano Ximenes Belo, OFM moris iha Dotik Alas iha loron 24 Marsu 1993, oan husi Abílio Marques no Cecilia Belo, Fr. Floriano oan daruak husi maun alin no feton nain walu mak hanesan tuir mai nee, Sequito Marques Belo (matebian), Frei Floriano Ximenes Belo, Flamina Belo (matebian), Armindo Amaral Belo, Crisno Sabino Seak, Imanuel Belo, Isabel Pereira Belo, Pascoal Belo.
Fr.Hermenegildo Gomes Soares, moris iha Ossu, iha loron 20 fSetembro 1991, oan husi Antonio Soares no Olinda Guterres natural Ossu, Baca-Issi, Fr.Hermenegildo oan ba dahaat, husi maun alin nain hitu mak hanesan, Francisco Pinto Soares, Julio da Costa Saldanha, Cesário Barros, Fr. Hermenegildo Gomes Soares, Crispim da Costa (matebian), Rui da Costa (matebian), Sabulai da Costa (matebian).
Fr. Norberto Domingos Tilman Carlos Lopes, moris iha Aileu, loron 4 Outubro 1993, oan husi Pedro Mendonça Carlos natural Aileu Daisoli no Maria do Carmo Tilman natural Maubisse.
Fr.Norberto oan ba dala walu, hosi maun alin no feton nain sia mak hanesan, Agostinho Tilman Carlos, Filomena Tilman carlos, Falecida, Madalena Tilman Carlos, Falecida, Nuno Mendonça Tilman, Madeira Tilman Carlos, Fonseca Tilman Carmo, Rudolfo Nóe Tilman Alberto Carlos,
Fr. Norberto Domingos Tilman Carlos Lopes, Titi Nur Haiyati Tilman Carlos, Falecida.
Frei Tiago de Jesus Pereira, moris iha Ermera, Hatolia A. iha 13 Dezembro 1991, oan hosi Alberto de Jesus (Matebian) no Anita Pereira (Matebian) oan ikus hosi maun alin no feton nain 9 mak hanesan, Anjulina Barros (matebian), Lucinda Castro, João de Jesus (matebian), Hermina Castro, Albertina Castro, Duarte Borromeu, Elsa Castro, Isabel Castro no Frei Tiago de Jesus Pereira.
Partisipa iha misa solenidade São Jose no Ordenasaun Diakonal, Madre Frater, estudantes, sarani no familia diakonu nain 5 nian.
(joa)
