DILI, STLTIMORLESTE.com – Tribunal Judisial Primeira Instansia Dili (TJPID) halo julgamentu ba kazu krime ofensa integridade fizika simples no arma branka neebe alega envovle husi arguidu inisial RHA, tanba sona kanek Vitima Avelino.
Tuir akuzasaun Ministeriu Publiku katak, iha loron 5 fulan Junhu tinan 2023, por volta 14:15, fatin Bebonuk, Dom Aleixo, Dili, lezadu Avelino da Costa de Jesus halo seguransa iha kompanhia Sentinel Group Lda.
Arguidu RHA sikat katana maubeka naruk 57 cm no luan 19 cm iha kotuk, lori mai hasoru lezadu hodi hateten, se mak haruka o mai servisu iha nee, hateten ba iha supervisor, hodi haruka fila se lae o nia rate kiik tau kedan iha nee.
Arguidu hasai katana husi kotuk hodi taa dala ida kona lezadu nia kanotak parte karuk hetan kanek.
Arguidu halo asaun hasoru lezadu, tanba antes nee nia mak halo seguransa iha fatin akontesimentu, maibe kompanhia hasai nia tanba nia abandona servisu.
Sasin Eligio Baptista Rangel haree, hodi halai ba hakuak arguidu no lezadu halai hodi ba kondus nia motorizada ba iha edifiiu kompanhia no lori kedan ba iha Polisia.
Konsekuensia husi taa nee lezadu hetan moras iha fatin atinjidu no trauma tanba arguidu kaer sasan kroat. Arguidu hatene katak bainhira kaer sasan kroat hodi taa ema nia isin bele hetan kanek no proibi, maibe nia lori nafatin.
Arguidu halo krime ho livre, deliberada, konsentemente no hatene katak hahalok nee probidu no hetan pena tuir lei.
Arguidu hanesan autor material ba konkursu krime ofensas integridade fizika simples previstu tuir artigu 145 husi kodigu penal no krime armas brankas Lei N.º 5/2017 regime juridiku pratika arte marsiais, ritual, armas brankas, rama ambon.
Hatan ba akuzasaun nee, arguidu RHA deklara faktus sira neebe mak akuza arguidu los hotu.
Hafoin rona tiha deklarasaun husi arguidu no vitima, tirbunal liu husi Juiz José Escurial husu Ministériu Públiku ba iha alegasaun.
Iha alegasaun Ministériu Publiku husu Tribunal atu aplika pena unika, maibe ninia ezekusaun ba pena suspensaun.
Parte defeza konkorda ho Ministériu Públiku nia pedidu, tanba haree ba arguidu konfensa faktus, arguidu nia hahalok nee laos intensaun atu oho vitima.
Rona tiha alegasaun, Tribunal marka fali ba iha loron 13 fulan Abril oras 9:30, hodi rona desizaun.
Audiensia Julgamentu nee prezide husi Juiz koletivu José Escurial, Juiza Francisca Cabral no Juiza Estajiaria, Ministériu Públiku reprezenta husi Prokurador Nelson Magno, no arguidu hetan asistensia legal husi Defensor Publiku Fernando de Carvalho.
(ter)
