DILI, STLTIMORLESTE.com – Tribunal Judisial Primeira Instansia Dili, iha loron Kuarta nee (27/08/2025) halao prosesu primeiru interogatoriu ba arguidu ho inisial CS, neebe sona mate motorista Mario Salsinha iha Munisipiu Ermera.
Arguidu lori mai iha Tribunal, no husi parte Ministeriu Publiku nian promove arguidu ho krimi Omisidiu Simples no Arma Branka.
Iha primeiru interogatoriu nee, Juiz turnu Ersilia de Jesus halo tiha identifikasaun ba arguidu no ikus mai deside hodi aplika medida Prizaun Preventiva ba arguidu.
Tribunal aplika medida refere, tanba konsidera iha indisus ba krimi neebe mak dun ba arguidu.
Iha alegasaun Prokurador Ozorio de Deus husu Tribunal atu aplika medida Prizaun Preventiva ba arguidu, tanba konsidera iha indisus forte ba krimi neebe promove mai iha Tribunal.
Enkuantu husi parte Defeza, Anzelmo Pinto Akara husu ba Tribunal atu aplika medida neebe adekuadu no profisional.
Maibe ikus mai Tribunal tetu no deside aplika medida Prizaun Preventiva ba arguidu.
Nunee tuir regra neebe iha, kuandu husi parte sira la konkorda ho despaisu Tribunal nian sei halo rekursu ba iha TR no tuir prazu neebe iha loron 30.
Prosesu nee prezide husi Juiz Turnu Ersilia De Jesus, Ministeriu Publiku reprezenta husi Prokurador Ozorio De Deus, arguidu hetan asistensia legal husi Defensor Publiku, Anzelmo Pinto Akara.
Tuir kronolojia katak, kazu omisidiu akontese iha loron 25 fulan 08 tinan 2025, iha Munisipiu Ermera, Postu Administrativu Ermera, Suku Riheu, Aldeia Sosoher Lokal Maudiu.
Krimi nee akontese inisiu husi asidente trafiku entre kareta ho motor hodi rezulta vitima ho inisial Crispin Soares mate iha fatin, ho ida nee mak vitima nia maun suspeitu CS nakonu ho emosaun lori tudik ba sona mate kedas vitima Mario Salsinha neebe hanesan Motorista ba kareta refere.
(ter)
