DILI, STLTIMORLESTE.com – Empreza Sinar Sosro Gunung Slamat husi Indonezia neebe ninia produtu Country Choice faan iha Timor Leste (TL), premeira vez halao Sorteu Premiu Espesial Country Choice neebe realiza iha ambitu Night Market iha Resintu Timor Plaza, Dili, rezulta ema nain neen (6) manan motor, ema nain 25 manan telemovel Smart Phone no sira seluk hetan voucher kompras nian.
Premiu Espesial Country Choice nee espesialmente entrega direitamente husi Jerente Jeral Internasional Sales Marketing Export Empreza Sinar Sosro Gunung Slamat, Sylvia Kurnia iha ambitu Night Market, Resintu Timor Plaza, Dili, Sabadu (14/2/2026).
Eventu Sorteu Premiu Espesial Coutry Choice nee halao iha loron domin nian ka loron Valentine Day. Tanba nee, komunidade sira neebe durante nee kompras produtu Country Choice nadodon mai iha Timor Plaza hodi rona no akompania direita sorteu premiu espesial country choice neebe anima ho muzika no knanuk furak neebe aprezenta husi grupu muzika Fantastika.
Jerente Jeral Internasional Sales Marketing Export, Sylvia Kurnia hatete katak eventu sorteu premiu espesial country choice nee halao ho objetivu atu hato’o sira nia apresiasaun no agradesementu husi Empreza Sinar Sosro Gunung Slamat ba povu Timor Leste neebe durante tinan barak nia laran konsumu produtu country choice nomos country choice nia kontribuisaun ba povu Timor Leste kuaze tinan 20 ona.
“Ami apresia tebes ba povu Timor Leste nian lealdade no devosaun neebé kontinua konsumu produtu country choice, tanba country choice maka hemu ida neebé halo hosi ai-fuan guava loloos ne’ebé kuda iha Java Sentrál iha Indonezia, nunee nia sabór hanesan ai-fuan loloos. Ba sira neebé sofre moras dengue, malária no isin-manas makaas, benefísiu sei fila fali ba sira-nia isin tanba guava kontein vitamina C dala haat liu duké ai-fuan sira seluk,” dehan Sylvia Kurnia ba jornalista sira hafoin entrega xave motor no telemovel Smart Phone ba manan nain sira iha Resintu Timor Plaza, Dili, Sabadu (14/2/2026).
Nia dehan, eventu ida nee hanesan eventu dahuluk neebe sira realiza no hein katak karik resposta husi povu Timor-Leste pozitivu no entuziazmu, sira sei halao eventu hanesan no halo diak liutan, atu nunee, ema barak maka hetan premiu husi Country Choice.
Jerente Jeral Internasional Sales Marketing Export nee mos informa katak iha tinan 2009, ba dala uluk hahú halo esportasaun no komersializasaun Country Choice iha Timor Leste. Iha tempu neebá, médiku sira husi Nasoins Unidas (ONU) halo tratamentu ba ema Timor-oan barak neebé sofre moras malária no dengue no eduka ema timoroan barak liuhusi enkoraja sira atu hemu Country Choice Guava ho badinas tanba Guava nee halo husi ai-fuan loloos, ai-fuan guava moris barak iha Java Sentral, Indonézia.
Nia haktuir tan katak produtu nee distribui barak ona iha nivel internasional, inklui iha nasaun ASEAN sira hanesan Filipina, Kambodia, Malázia, Brunei Darussalam, Vietname, Tailándia, Singapura, no Timor Leste.
Aleinde nee, iha Europa, hanesan Reinu Unidu, Olanda, no Alemaña, no mós iha Kanadá, Médiu Oriente, Arábia Saudita, Qatar, Abu Dhabi, Jordánia, Pakistaun, Maldivas, Estadus Unidus, Papua Nova Guiné, Samoa Amerikana, Samoa Osidentál (Apia), Hong Kong, Japaun, Koreia, Taiwan, no Xina.
Entretantu, Cresencio Carvalho da Costa, neebe manan motor iha sorteu premiu espesial country choice nee, dehan, nia kontenti no orguilhu tanba iha loron domin nee nia hetan sorti neebe nia nunka mehi. Tanba nee, nia hato’o agradese ba Country Choice neebe realiza eventu ida nee.
“Hau foin sosa dala ida deit bele hetan motor nee. Tanba nee, ba oin hau hakarak sosa nafatin country choice, tanba country choice iha nia benefisiu ba ita nia saude,” dehan Cresencio da Costa.
Nunee mos nain ba Restaurante ka Depot Formosa, Alung hatete, kuaze tinan 20 nia laran nia faan country choice iha ninia restaurante neebe lokaliza besik Eskola Xina Maromak.
“Ema sira neebe han iha hau restaurante nee sempre hemu country choice. Loron ida, kaixa rua to’o tolu hotu,” dehan Alung.
(mik)
