DILI, STLTIMORLESTE.com – Fornesedor merenda eskolar sosa sala ikan neebe kahur ho ikan tongkol, halo lanu estudantes nain 16 husi Ensinu Baziku Filial (EBF) Budi, neebe lokaliza iha Batugade, Munisipiu Bobonaro, no evakua kedas ba sentru saude, maibe daudaun nee sira fila ona ba uma.
Lia hirak nee hatoo husi Xefe Departamentu Merenda Eskolar iha Ministeriu Edukasaun, Belchior Maria Almeida Barros Guerra ba jornalista STL iha nia knaar fatin Vila Verde, Sesta nee (13/06/2025).
“Akontesimentu nee akontese kedas hori bainruak, laos horiseik, neebe mak ita nian ekipa EJP sira mak hola ikan no ikan balun kahur ho ikan tongkol, entaun iha momentu sira prepara nee sira la haree didiak, oinsa mak ikan tongkol nee prepara tuir prosedimentu neebe mak iha, agora sira halo tiha hotu ikan nee fo ba labarik sira hamutuk 244 neebe mak iha eskola nee ou total estudantes neebe simu merenda eskolar nee iha estudantes 16 mak konsumu ikan tongkol, depois de sira han iha 15 minutu, liu-liu inan man balun hela besik iha neeba, sira haree fo apoiu bee, nuu been, halo kedas prevensaun, nunee sira sente oin halai, provoka sira atu muta,” dehan nia.
Nia dehan, husi parte Edukasaun Munisipiu Bobonaro, Saude, Prezidente Autoridade tun direitamente ba apoiu ida nee, iha momentu neeba foti kedas estudantes nain 16 ba kedas halo agendamentu iha klinika Batugade ninia hodi tau soru, neste momentu sira konfirma nafatin kontrola dadus estudantes nain 16, maibe sira diak hotu ona fila ona uma no la hetan buat ruma neebe grave, iha situasaun neebe akontese hori bainruak ba labarik sira, fornesedor sira mak sosa sala ikan.
“Foin daudaun ami koordena hela ho parte Ministeriu Saude ninia oinsa mak atu halo prevensaun, atu nunee buat sira nee labele akontese tan, oinsa parte saude nian nee atu fo mobilizasaun ida haree, ho nunee EJP sira prepara hahan neebe mak diak, maibe ita iha padraun menu neebe mak iha parte Ministeriu Saude prepara nee ita bele dehan buat neebe kompletu, maibe ita nian EJP sira nee mak dala ruma ladun iha komprensaun didiak atu prepara ikan nee ho didiak hodi fo ba ita nian oan sira han. Horiseik hau koordena kedas ho parte diresaun nasional nutrisaun ninia, neebe mak elabora hela menu ba eskola sira hotu, husi parte saude ninia ami halo hela koordenasaun oinsa mak atu nafatin fo formasaun ba ita nian EJP sira,” tenik nia.
(jac)
