DILI, STLTIMORLESTE.com – Sosiedade Sivil husu Komisaun Anti Korrupsaun (KAK) nomos Polisia Nasional Timor Leste (PNTL) neebe halo buska ba ajende SERVE deskonfia korupsaun, ida nee labele para ho investigasaun, maibe tenke prosesu too final.
Kestaun nee hatoo husi Diretor HAK, Feliciano da Costa Aroujo ba jornalista sira iha nia knaar fatin Farol, Dili, Kuarta (26/02/2025) hatete, foin lalais nee KAK hamutuk ho PNTL halo buska ba Instituisaun SERVE, tanba deskonfia Korupsaun ba ejente SERVE labele hela deit iha investigasaun, maibe prosesu tenke too final.
“Ida nee foin lalais viral tebes entre diretor ho nia adjuntu, buat sira nee mosu polemika iha sosiedade nia leet, hau hanoin sosiedade rasik hakarak klareza no klarifikasaun ida neebe klaru ba informasaun refere, nee kompetensia KAK nia nomos husi instituisaun Kriminal nia, hanesan deklarasaun nee fo sai husi Komisariu KAK, “ katak Diretor HAK nee.
Nunee mos Diretor AJAR, Jose Luis de Oliveira husu KAK ho polisia labele para deit iha nee, maibe prosesu nee kontinua nunee bele hetan solusaun.
“Ita hein katak buat nee labele sai fali hanesan panas panas tai ayam katak manas tiha derepente malirin, maibe ita hakarak buat ida korupsaun nee nuudar krimi neebe mak sai inimigu ba estadu, nunee instituisaun no ajente estadu nee tenke kombate ida nee labele hili deit kazu, prosesu nee tenke too hotu,” katak nia.
Nia hatete, iha tinan kotuk KAK halo intervensaun ba Ministeriu no Diretor balu, maibe ikus la lori ba Tribunal, ida nee mak halo publiku duvidas oituan, KAK nee hanesan nee servisu la seriu.
(eme)
