DILI, STLTIMORLESTE.com – Konselhu Ministru diskute ona atu kria sistema dijital hodi responde ba Saude, ho ida nee sosiedade sivil husu Governu iha planu tenke hatudu ho komitmentu.
Kestaun nee hatoo husi Diretor HAK, Feliciano da Costa Aroujo ba STL iha nia knaar fatin Farol, Sesta (24/01/2025).
Nia hatete, planu neebe hatoo iha Konselhu Ministru ida nee tenke hatudu iha komitmentu.
“Nee hanoin diak husi Konselhu Ministru kona-ba ida nee, maibe hau atu dehan deit inisiativa sira nee tuir kedas ho vontade, no planu ida neebe ita atu hatete karik hatudu ho komitmentu boot,” dehan Diretor Hak nee.
Nia dehan, se atu uza dijital, maibe too ohin loron hein hela fiber optika, no iha deklarasaun balu neebe hatete ona mai iha Outubru tinan kotuk mai ona, espektativa husi HAK nia mak antes mandatu remata bele realiza ona promesa balu.
Nia hatutan, kompanhia boot tolu iha Timor Leste maibe internet lao lenuk los, antes nee promete halo dijitalizasaun ba pasaporte, ida nee mos sai problema, neebe espektativa mak nee, hanoin kria dijital hodi haree saude nee diak louva ba inisiativa governu, maibe tenke hatudu iha vontade no komitmentu, labele buat hotu dependensia ba Primeiru Ministru.
Nunee mos Peskizador AJAR, Inocencio Xavier de Jesus hatete, politika ida nee diak, importante mak tau ema neebe jere dijitalizasaun tenke iha konhesimentu.
“Importante mak tau ema neebe jere dijitalizasaun tenke iha konhesimentu, labele tau fali tali futu aibaku ida ba la hatene sistema, ikus mai kontinua aimoruk laiha,” katak nia.
Nia hatutan, iha buat balu neebe sira nota halo diskusaun ho doutor balu neebe hatete laos laiha aimoruk, maibe tanba ema sira neebe ba troka sira la hatene kode rai aimoruk, ikus doutor sira halo pedidu husu aimoruk sira resposta fali dehan aimoruk laiha, ikus mai aimoruk sira nee halo destruisaun, tanba ema ida neebe jere aimoruk nee la hatene aimoruk nia fatin, nee problema tanba mudansa ho ema.
Foin lalais Governu liu husi Konselhu Ministru halo ona diskusaun oinsa atu kria sistema saude dijital hodi bele responde ba kestaun saude iha Timor Leste.
Iha reuniuan Konselhu Ministru neebe halao foin lalais Ministru Konselhu Ministru Hermenegildo Agio Pereira ho Koordenador Gabinete Dezenvolvimentu Politika publikas estratejika Andre Monteiro halo aprezentasaun kona-ba saude dijital.
(eme)
