DILI, STLTIMORLESTE.com – Sosiedade Sivil (SS) neebe mak luta ba direitu feto ezije Ministeriu Edukasaun (ME) aselera lalais politika fila hikas eskola, nunee bele hetan mos aprovasaun husi Konselhu Ministru hodi bele tau iha implementasaun.
Kestaun nee hatoo husi Diretora Ezekutivu Fokupers, Domingas Afonso Amaral ba STL nia knaar fatin Farol, Segunda (04/11/2024).
“Ezije ME atu lalais ho seriedade aselera politika fila hikas eskola, tanba ate a data politika fila hikas ba eskola seidauk implementa no seidauk ratifika aprova husi KonselhuMinistru. Tanba ida nee liga relatoriu ita nia ba iha konvensaun Cedaw, ita dehan ona katak, ita aselera ida nee maibe too agora seidauk,” dehan nia.
Nia katak, sira hakarak aselera lalais, tanba esperiensia Fokupers nia haree labarik vitima minoridade sira depois hetan violensia, no feto isin rua sedu no sira hetan violensia seksual, sira susar los fila fali ba eskola.
Nia hatutan, aleinde ida nee sensibilizasaun ba manorin sira importante, liu-liu liga ho saida mak violensia bazeia ba jeneru nomos oinsa sira nia atendimentu ba iha vitima no labarik sira bainhira hetan violensia.
Nunee mos Marilia da Silva Alves husi Parseria Dezenvolvimentu Humanu husu Governu liu husi ME atu bele implementa ona politika fila hikas ba eskola, no oinsa mak halo mos atendimentu ba vitima sobrevivente bainhira halo tratamentu.
Afonso Soares husi Xefe Gabinete husi Ministeriu Edukasaun hatete, kona-ba asesibilidade ida nee edukasaun laiha problema, tanba ohin loron politika edukasaun inklusiva mosu, entaun relasiona ho asesiblidade purzemplu koalia kona-ba infraestrutura, kada infraestrutura nee sempre iha standar minimu bainhira sira halo infraestrutura ruma aprezenta lai sira nia dezenhu VOQ, se lae mak sei rezeita.
(eme)
