DILI, STLTIMORLESTE.com – Diretor Servisu Saude Munisípiu Dili (SSMD), Mateus Pinto hatete, iha fulan Marsu tinan nee Servisu Saúde Munisípiu Dili (SSMD) rejista kazu dengue hamutuk 84, husi numeru nee nain 1 mak mate.
“Husi fulan Marsu mai too horiseik nee ita rejista ona kazu dengue hamutuk 84, husi númeru nee nain 1 mak mate,” hatete Diretor SSMD, Mateus Pinto ba jornalista sira iha knaar fatin Bairu Formoza, Tersa (25/03/2025).
Nia dehan, husi kazu sira nee maioria mai husi Postu Administrativu Dom Aleixo, tuir mak Cristo Rei, Metinaro, Nain Feto no Vera Cruz, no labarik sira neebe mak hetan dengue nee husi idade tinan 5 too 14, tinan 1-4, idade 25-49 no menus husi tinan 1.
Nia esplika, dengue nuudar moras ida neebe kauza husi virus no hadaet liu husi vektor. Moras nee hadaet husi susuk aedes aegypti infetadu nia tata. Dengue la hadaet husi ema ba ema, no intensidade tata aas liu mak maizumenus oras rua hafoin loro-matan sae no molok loro-matan tun.
Nia deklara, sinais sintomas husi dengue mak hanesan isin manas, ulun moras makaas, moras iha matan fukun, muskulu no artikulasaun moras makaas no mosu erupsaun iha kulit.
Kona-ba tratamentu dengue laiha tratmentu espesifiku hodi hamate virus dengue iha ema nia isin. Ba ema neebe hetan infeksaun no baixa iha fasilidade saude, mediku sira halao deit jestaun kazu neebe diak. Jestaun kazu nee mak halao liu husi maneira hanesan fo nutrisaun iha fasilidade saude fo soru been, fo hemu bee no fo han aifuan vitamina barak no mediku sira dala ruma fo mos aimoruk paracetamol hodi rezolve isin manas neebe iha.
(jen)
