DILI, STLTIMORLESTE.com – Diretor Servisu Saude Munisipiu Dili (SSMD), Mateus Pinto hatete, iha fulan Janeiru 2025, SSMD rejista kazu dengue hamutuk 67, maioria labarik ho idade tinan 5 mai kraik mak afetadu ba moras dengue.
“Ita iha fulna Janeiru deit rejistu ona kazu dengue hamutuk 67 neebe afeta ba labarik idade tinan 5 mai kraik,” hatete Mateus Pinto ba STL iha nia knaar fatin SSMD, Formoza, Díli, Kinta (06/2/2025).
Nia dehan, labarik sira nee afetadu husi tinan 5 mai kraik no mos idade tinan 7 ba leten, depois area neebe afetadu liu mak Postu Administrativu Dom Aleixo tuir mai mak Kristu Rei no Nain Feto.
“Kazu nee iha Dom Aleixo mak barak liu, tuir mak Kristu Rei, Nain Feto no Vera Kruz, entaun iha fulan nee ita seidauk rejistu ema mate ba dengue,’’ nia esplika.
Nia husu ba familia sira idak-idak, oinsa atu bele hamoos uma ninin no hamoos bee neebe mak nalihun iha akua ka kalen sira, nunee prevene susuk labele tolun ba hodi fo moras ba populasaun sira.
Iha fatin ketak, Komunidade Suku Komoro, Maria dos Santos Banca informa, agora tempu udan, tanba nee iha Suku Komoro komunidade ida-idak halo limpeza iha uma oin no hamoos valeta neebe sempre bee nalihun.
(jen)
