DILI, STLTIMORLESTE.com – Hahu fulan Janeiru too mai Abril, Servisu Saúde Munisípiu Ermera (SSME) rejistu kazu dengue hamutuk 130 resin no iha fulan Abril nain 1 mak grave tanba hetan moras dengue.
“Iha fulan Abril nee ita hetan pasiente ida ho idade 29 anos neebe moras dengue, maibe ita fo lalais tratamentu no agora rekopera fila ba uma ona,” hatete Diretór Servisu Saúde Munisípiu Ermera, António de Deus Fátima ba jornalista sira iha MS Kaikoli Dili, Tersa (12/05/2025).
Nia tenik, Servisu Saúde Munisípiu Ermera kontinua halo promosaun saude no halao sosializasaun ba komunidade sira, atu nunee sira bele halo prevensaun ba moras iha sira nia familia no komunidade.
“Ita sempre fo avizu katak, sira tenke halo prevensaun mak hakoi sira nia kalen aat sira, nomos hamoos roda, hamoos uma ninin sira, atu nunee susuk labele tolun iha neeba hodi lori moras dengue ba sira,” nia deklara.
Iha fatin hanesan, Pasiente Maria Banca dos Santos baixa iha Sentru Saude Komoro hetan moras dengue no baixa durante semana ida, tanba kondisaun ladún diak, maibe sei kontinua halo tratamentu hodi simu aimoruk.
“Hau baixa iha nee Sentru Saude Komoro durante semana ida, no ohin hau mai simu aimoruk no hasai ran fila-fali atu haree sei moras dengue pozitivu ga lae,” nia afirma.
(jen)
