BAUKAU, STLTIMORLESTE.com – Sekretariadu Tekniku Administrasaun Eleitoral (STAE) atende eleitores hamutuk 1.100 iha Postu Administrativu Baguia, Munisipiu Baukau, neebe transforma kartaun eleitoral semi biometriku ba sistema biometriku.
Administrador Postu Administrativu Baguia, Mario Xavier da Silva hateten, politika STAE nian kona-ba kobre Postu Administrativu sira iha Munisipiu Baukau atu transforma kartaun eleitoral semi biometriku husi eleitores sira ba fila fali kartaun eleitoral biometriku mak durante loron 5, hahu husi loron 28 Julhu too 01 Agosto tinan nee ekipa STAE Munisipiu Baukau destaka iha Postu Administrativu Baguia hodi atende eleitores sira.
“Sira ba ona iha Baguia durante loron 5 halo atendimentu eleitores sira husi Suku 10 konsentra iha Postu, komunidade sira entusiasmu tebes atendimentu troka kartaun nee iha Postu,” hateten Mario Xavier da Silva ba jornalista sira iha Vila Nova, Baukau, Tersa (12/08/2025).
Nia konsidera, STAE nia politika kona-ba troka kartaun eleitoral semi biometriku ba sistema biometriku realiza iha nivel Postu, nee politika diak, tanba lori besik atendimentu eleitoral ba eleitores sira atu muda troka kartaun eleitoral husi semi biometriku ba sistema biometriku, maibe ho durasaun tempu mak limitadu, tanba durante loron 5 seidauk kobre eleitores sira iha Postu Baguia.
Maibe hanesan Autoridade Postu koordena ona parte STAE Munisipiu Baukau atu aumenta loron atendimentu iha Postu Baguia nunee bele fo oportunidade ba eleitores sira neebe seidauk troka kartaun eleitoral tuan ba foun.
Tanba Autoridade Postu hamutuk ho Autoridade Suku sira iha Postu Baguia rekomenda ona ba STAE atu aproveita faze daruak atendimentu troka kartaun eleitoral iha Postu Baguia too iha nivel Suku, ho objetivu atu fasilita liu tan idozu no invalides sira neebe labele lao, maibe politika nee STAE labele implementa, tanba razaun linha internet no seluk tan mak lei STAE la permite atu atendimentu trata kartaun eleitoral ba eleitores sira too iha nivel Suku.
(tom)
