BAUKAU, STLTIMORLESTE.com – Husi fulan Outubru 2024 too ohin loron Sekretariadu Tekniku Administrasaun Eleitoral (STAE), Munisipiu Baukau atende ona eleitores rihun 30 resin trata karta eleitoral biometriku.
Diretor STAE Munisipiu Baukau, Natividade Freitas Guterres esplika, inisiu lansamentu kartaun eleitoral biometriku iha fulan Outumbru tinan 2024 too ohin loron STAE Baukau atende ona eleitores 26.17% ho numeru partisipasaun rihun 30 resin.
“Nee total ema neebe mai halo kartaun eleitoral hamutuk rihun 27.748 ida rejistu foun nee total hamutuk 2415,” hateten Natividade iha Vila Nova, Baukau, Kuarta (24/09/2025).
Nia sublina, eleitores rihun 27 resin husi numeru eleitores troka eleitoral semi biometriku ba biometriku no eleitores 2415 nuudar eleitores foun neebe STAE Baukau fo atendimentu iha nivel edifisiu STAE Munisipal no iha nivel Postu Administrativu.
Maibe husi numeru eleitores semi biometriku neebe trata no muda ona kartaun eleitoral ba biometriku atinjimentu sei kiik, tanba numeru neebe eziste rihun 103.240, maibe foin atualiza deit rihun 27 resin.
“Barak mak seidauk ita bele dehan 70% ital mak seidauk mai troka, maibe ida nee la signifika ema iha hotu, dala ruma ita tais ona sira neebe kartaun dupla sira nee, mate barak mak ita seidauk hasai tanba Xefe Suku sira la fo lista mate ba ita, entuan kada elisaun lista sae, maibe partisipante tun entaun liu husi biometriku nee bele minimiza erru sira nee,” Natividade akresenta.
Diretor nee deklara, atendimentu kartaun eleitoral biometriku iha edifisiu STAE Baukau kontinua lao diak tuir orariu neebe iha no tuir sei kobre tan Postu Administrativu sira iha Munisipiu Baukau ba segundu faze nian, tanba iha faze primeiru seidauk kobre eleitores sira hotu liu liu ema idozu no difisiensia sira.
“Planu semana oin hanesan nee ami hein deit orientasaun husi nasional ami sei tun fila fali faze segundu nian iha kada Postu loron 5 fo atendimentu ba komunidade prioridade ema idozu no difisiensia,” Natividade katak
Diretor nee argumentu, planu refere objetivu atu ajuda ema idozu sira, tanba daudau numeru idozu barak mak seidauk hetan kartaun eleitoral biometriku, tanba kestuan idade no saude labele marka prezensa iha edifisiu trata kartaun eleitoral biometriku.
Jornalista: Tomas Reis
Editora: Carme Ximenes
