BAUKAU, STLTIMORLESTE.com – Sekretariadu Tekniku Administrasaun Estatal (STAE) Munisipiu Baukau atende ona sidadaun idade 17 ba leten hamutuk 4.652 ba kartaun eleitoral sistema biometriku.
“Ita komesa iha fulan Outubru 2024, too dadus neebe tama iha dia 09 Janeiru ita atinji ona 4.652 eleitores neebe mai renova nomos halo foun,” hatete Diretor STAE Munisipiu Baukau, Natividade Freitas Guterres ba jornalista sira iha Vila Nova, Segunda (13/01/2025).
Nia sublina, husi numeru eleitores refere iha sidadaun nain 544 mak halo kartaun eleitoral foun, tanba idade atinji ona no eleitores tuan hamutuk 4.108 mak halo renovasaun husi sistema semi biometriku ba biometriku.
Tanba tuir nia, durante atendimentu ba sidadaun sira trata eleitoral foun ba sistema biometriku nian iha difikuldade mak hanesan atendimentu iha deit edifisiu STAE Munisipiu nian, nunee labele kobre no atualiza eleitores semi biometriku ba sistema biometriku ho lais, tanba numeru eleitores barak hela iha area remotas.
Aleinde mos difikuldade seluk mak sistema biometriku refere ho ligasaun interligadu neebe prosesu hotu halo koneksaun ba linha internet, maibe prosesu lentu, nunee obriga sidadaun balu tenke fila, tanba oras atendimentu remata.
Enkuantu eleitores husi Postu Administrativu Laga, Agosto Vital Ximenes Pinto agrumenta, nia parte dala 3 ona prezensa iha edifisiu STAE Baukau, maibe too ohin loron seidauk hetan atendimentu, tanba ema barak.
“Hau nia haree atendimentu hanesan nee ba iha Postu no Suku sira para fasilita ami diak liu tan, Governu tenke tau matan ba ida nee, tanba inan aman idade sira nee forma kleur maibe balu seidauk atende,” hateten Agosto.
Entretantu sidadaun iha Munisipiu Baukau neebe rejistu no hetan kartaun eleitoral semi biometriku hamutuk 103.240 no hetan oan atualizasaun ba sistema biometriku hamutuk 4.108.
(EST 2)
