BAUKAU, STLTIMORLESTE.com – Sekretariadu Tekniku Administrasaun Estatal (STAE) Munisipiu Baukau, daudaun laiha ona blanku hodi emprime kartaun Eleitoral Biometriku ba eleitores sira, maibe atendimentu nafatin hanesan baibain.
Diretor STAE Munisipiu Baukau, Natividade Freitas Guterres informa, atendimentu eleitores sira neebe trata kartaun eleitoral ba sistema biometriku, STAE Munisipiu Baukau hahu atende iha fulan Outubru tinan 2024, nunee too iha fulan Marsu tinan 2025 blanku ba kartaun eleitoral hotu, tanba atende ona ba eleitores sira.
“Hanesan ita hotu hatene, kartaun ID bland laos iha Baukau deit mak hotu, maibe nee anivel Nasional kartun stok hotu iha fulan Marsu liu ba,” hateten Natividade Freitas Guterres ba STL iha knaar fatin Vila Nova, Baukau, Tersa (06/05/2025).
Diretor sublina, blanku kartaun eleitoral Biometriku neebe antes nee STAE Nasional distribui ba STAE Munisipal sira inklui Baukau hetan blanku hamutuk rihun 8 resin, maibe kuaze atende ona ba eleitores sira neebe troka eleitoral semi biometriku ba biometriku no eleitores foun sira.
Nia fundamenta, mezmu blanku ba kartaun eleitoral biometriku daudaun iha edifisiu STAE Munisipiu Baukau laiha, maibe atendimentu simu eleitores sira kontinua lao, tanba iha ona informasaun husi Diresaun STAE Nasional ba nivel Munisipiu sira, Governu kontratu ona komapanhia balun atu lori mai Timor Leste hodi distribui ba kada Munisipiu imprime no distribui ba eleitores neebe naran rejistu ona iha data base.
“Atendimentu agora lao nafatin, ita atende deit eleitores neebe mai ita hatama dadus fo bilhete ida fo fila fali sira nia kartaun tuan ami vistu deit, maibe bainhira kartaun foun iha ami emprime ona avizu fali ba sira mai foti kartaun, hatama sira nia kartaun tuan,” Natividade akresenta.
Diretor nee informa, mezmu blanku ba kartaun eleitoral biometriku laiha, maibe atendimentu lao hanesan baibain, neebe husi fulan Marsu too Primera Semana fulan Maiu 2025 kuaze rejistu ona eleitores rihun rua resin no dadaun kontinua simu eleitores sira neebe hakarak rejistu hodi prosesu kartaun eleitoral biometriku.
“Nia impaktu nee mak orsida kartaun mai ita emprime dala ida kapasidade impesor nee nia la mampu atu emprime barak, entaun loron ida ita emprime deit 100 ou 200 nee ema barak mak sei antrian hodi simu,” Natividade argumentu.
Diretor STAE Munisipiu Baukau nee katak, mezmu atendimentu simu eleitores sira hodi rejistu naran iha data base dadaun kontinua kontinua lao, maibe sei fo impaktu ba prosesu emprime, tanba makina halo emprime ba eleitoral laiha kapasidade atu loron ida emprime ba kartaun eleitoral liu 300 ba eleitores sira.
Entretantu eleitores neebe eziste iha Munisipiu Baukau hamutuk 103.240, 10% hetan ona kartaun Eleitoral Biometriku no 90% seidauk.
(tom)
