DILI, STLTIMORLESTE.com – Aldeia Tahubein nakfila ba Suku, tanba hetan ona aprovasaun husi Governu, tanba nee Sekretáriadu Tékniku Administrasaun Eleitoral (STAE) no Komisaun Nasionál Eleisoens (CNE) Munisipiu no Nasional halao edukasaun sivika ba meza eleitoral no kandidatu sira prepara ba eleisaun.
Xefe Suku Mahaquidan, Cristovão Chances hatete, enkontru horiseik nee husi parte CNE, STAE sira mai halo edukasaun sivika kona-ba lalaok eleisaun nian, liu-liu kona-ba lei Poder Lokal, Numeru 9/2016.
“CNE ho STAE sira mai halo edukasaun sivika ba meza eleitoral no mos ba komunidade sira, tanba Aldeia Tahubein atu harii Suku foun”, dehan Cristovão.
Maibe iha intervensaun husi CNE katak, ba estrutura sira neebe too rezultadu mak eleitu sei sai responsabilidade ba Suku, no Aldeia ho onestidade.
Iha okaziaun nee partisipa husi Komandante PNTL Postu Alas, Administrador Postu Administrativu Alas, no sira hatoo apresiasaun boot ba Tahubein, tanba espasu ida Aldeia Tahubein nakfila ba Suku Tahubein née bele transforma Aldeia 19 sai ba 21 no Suku 6 iha Postu Alas.
Preparasaun ba eleisaun, tuir data neebe termina aban dia 10 Janeiru komesa hálo rejistu ba estrutura Suku, nunee hodi termina eleisaun ba Suku, depois de nee ba Xefe Aldeia no Delegado/a sira, sei akontese iha dia 25 Janeiru nee.
Tuir nia, kandidatura ba Suku sei loke hela ba publiku, no tuir informasaun sei nafatin hela ho kandidatu neebe mak iha ona, foin nain1, maibe informasaun katak, aban iha kandidatu feto ida sei submete mos dokumentus atu kompete iha eleisaun.
Entretantu Aldeia Tahubein neebe transforma bá Suku mai ho Aldeia 3 hanesan Aldeia Bisuda-Buibere, Aldeia Weda, no Aldeia Uma Tali Boot.
Nunee mos, Alarico Martins hanesan Visi Sekretariu II iha Suku Tahubein hatete, horiseik loron 07 Janeiru 2025, husi STAE Nasional no Munisípiu Manufahi mai halo treinamentu ba ekipa meza eleitoral, hamutuk ho Kandidatura sira. No Kuarta (08/01/2025) marka prezensa husi Komisáriu Nasional CNE, Diretora CNE Munisipiu Manufahi, Administrador Postu Aadministraivu Alas, Komandante PNTL Squadra Alas, Xefi Suku Mahaquidan no Lider Partidus Polítiku Asentu Parlamentar, hodi desamina informasaun kona-ba lalaok eleisaun Suku no Aldeia.
“Nuudar ekipa susesu atu hatete katak, reprezenta komudidade Tahubein tomak hodi halo proposta ba governu no ezije direitu ba hamoris fali Suku Tahubein ho objetivu atu hakbesik dezevolvimentu ba komunidade, administrasaun bele fasilita komunidade Sira atu fasil hetan atendimentu”, katak Alarico.
(gui)
