MANATUTU, STLTIMORLESTE.com – Sekretariadu Tekniku Administrasaun Eleitoral (STAE), Munisipal Manatutu atualiza eleitores 14.000 resin ba kartaun biometriku.
Haktuir Diretor STAE Munisipal Manatutu, Mariano Natalino Soares da Silva ba jornalista iha Manatutu, Sesta (19/09/2025).
Nia hatete, oras nee daudaun STAE Munisipal Manatutu atualizadu eleitor 14.000-resin ba kartaun biometriku.
“Kona-ba resensiamentu eleitoral no atualizasaun baze dadus ho baze biometriku STAE Munisípiu Manatutu, dezde inísiu hahu iha Outobru 2024 too mai ohin loron, ita konsege atualiza ona eleitor 14.000-resin,” dehan nia.
Nia haters, rejistu foun kuaze 1.000 no ema neebe seidauk atualiza kuaze 23.000. Agora total eleitor Munisípiu Manatutu hamutuk 38.000-resin. No Agora daudaun sei suspende atividade atendimentu movel neebe iha Postu Administrativu sira, maibe atendimentu iha munisípiu Manatutu hanesan baibain deit.
“Depoiz ami finaliza tiha atedimentu movel ba faze dahuluk neebe hahu iha 28 Jullu too mai ohin loron, kuaze movel tama hotu ona,” nia tenik.
Nia haktuir tan, atendimentu movel iha nivel postu administrativu nee hahu ona husi Postu Administrativu Laklo, Laklubar, Barike, Soibada, hafoin Laleia, Manatuto villa. No dadaun nee STAE Manatutu prepara hela atu ba halo atendimentu faze daruak ba atedimentu movel iha postu administrativu. Tuir planu semana oin halo koordenasaun ho postu administrativu sira, nunee hahu fali atividade movel iha postu administrativu sira.
Nia hatutan, STAE iha dezafiu neebe hasoru mak linha internet tanba hatene atualiza ho biometriku presiza lina internet neebe adekuadu, nunee bele halo validasaun neebe lalais liu, nunee STAE bele ajuda serbisu iha Manatutu.
Jornalista: Emerenciana Pinto
Editora: Domingas Gomes
