BAUKAU, STLTIMORLESTE.com – Sekretariadu Tekniku Administrasaun Eleitoral (STAE) Munisipiu Baukau seidauk halo afiksasaun ba eleitores sira husi Suku 5 iha Postu Administrativu Kelikai Antigu, Munisipiu Baukau, tanba seidauk iha diploma legal.
Diretor STAE Munisipiu Baukau, Natividade Freitas Guterres hateten, politika STAE nian ba kobre Postu Administrativu sira iha Munisipiu Baukau kuaze fo ona atendimentu ba eleitores sira kona-ba trata kartaun eleitoral biometriku nian, maibe iha Postu Administrativu Kelikai Antigu kompostu Suku 5 hanesan, Suku Abafala, Gurusa, Afasa, Uaitame no Namanei parte STAE seidauk halo afikzasaun klaru tuir Postu Kelikai Antigu, tanba parte STAE seidauk hetan diploma legal ba Postu Administrativu nee.
“Problema nee hau rasik koalia ona ho Prezidente Autoridade, Administrador Postu Kelikai Antigu no hau, hatoo ona problema ba ami nia Diresaun Jeral STAE Nasional sira nia hatan mak so liu husi Autoridade Lokal rezolve lalais asuntu ida nee hamosu diploma ruma, para afisksaun klaru nunee ita hatama ba sistema,” Natividade hateten ba jornalista sira, iha nia knaar fatin Vila Nova, Baukau, Segunda (15/12/2025).
Nia sublina, Postu Administrativu Matebian nuudar mos Postu Administrativu foun neebe eziste hamutuk ho Postu Kelikai Antigu, maibe afisksaun ba eleitores klaru, tanba komunidade husi Suku sira neebe pertense ba Postu Matebian laiha problema, enkuantu Suku 5 neebe pertense ba Postu Kelikai Antigu iha Suku 2 hanesan Abafala no Uaitame, komunidade sira balu hakarak mantein ho Postu Kelikai Antigu no balu hakarak ba Postu Kelikai.
Ho razaun nee difikulta iha prosesu afikzasaun ba eleitores sira nunee eleitores sira husi Suku 5 hanesan Suku Abafala, Gurusa, Afasa, Uaitame no Namanei iha sira nia kartaun eleitoral mantein ho Postu Kelikai mezmu atual Kelikai Antigu eziste hanesan Postu Administrativu.
“Nee Autoridade sira prezisa aprosima ho komunidade, mezmu ita haree sira ba ona halo aprosimasaun maibe ita seidauk hetan nia solusaun ita haree sei iha dezentendimentu,” Natividade katak.
Diretor STAE Munisipiu Baukau nee fundamenta, dezentendimentu neebe iha Postu Kelikai Antigu fo impaktu ba sidadaun sira iha trata dokumentus sira, bainhira iha kartaun eleitoral Postu Kelikai deklarasaun Suku no seluk tan tau Postu Kelikai Antigu.
Tanba nee husu Autoridade Munisipiu Baukau atu solusiona problema neebe daudaun Postu Kelikai Antigu infrenta, kona-ba Suku 2 hanesan Abafala no Uaitame rejeita ba Postu Kelikai Antigu.
Liga asuntu nee STL tenta konfirma Prezidente Autoridade Munisipiu Baukau, Veneranda Lemos maibe seidauk bele fo komentariu, tanba kondisaun moras.
Mezmu nunee esforsu neebe Autoridade Munisipiu Baukau halo ona mak iha loron 09 Dezembru 2025 liu husi Konselhu Konsultivu Munisipal realiza eleisaun ba Suku 2 refere no hetan onan rezultadu sei aprezenta ba Ministeriu hafoin kontinua prosesu ba oin hodi deside Suku 2 refere pertense ba Postu Administrativu neebe loos.
Jornalista: Tomas Reis
Editora: Carme Ximenes
