BAUKAU, STLTIMORLESTE.com – Sekretariadu Tekniku Administrasaun Eleitoral (STAE) Munisipiu Baukau seidauk bele fo atendimentu ba eleitores sira iha nivel Postu Administrativu Kelikai Antigu, Munisipiu Baukau, tanba seidauk iha baze legal.
Diretor STAE Munisipiu Baukau, Natividade Freitas Guterres esplika, relasiona politika STAE nian kobre nivel Postu Administrativu sira iha Munisipiu Baukau, hanesan Baukau Vila, Baguai, Kelikai, Matebian, Venilale no Vemasi hodi fo atendimentu ba eleitores sira kona-ba tratamentu kartaun eleitoral biometriku nian, maibe labele kobre Postu Administrativu Kelikai Antigu, tanba iha problema afiksasaun Suku Postu foun.
“Kelikai Antigu mak ita seidauk kobre tanba sira iha problema oituan kona-ba afiksasaun Suku ba Postu foun nee, tanba tuir sira nia pedidu uluk harii Postu Suku 5, maibe sira mosu problema seidauk mosu diploma ruma entaun ita seidauk hatama ba sistema, tanba nee Kelikai Antigu mak ita seidauk tama, maine Postu seluk ita ba ona,” hateten Natividade iha Vila Nova, Baukau, Kuarta (24/09/2025).
Nia sublina, opiniaun estabelese hikas Postu Kelikai Antigu mai husi Suku Abafala, Afasa, Uaitame, Gurusa no Namanei nunee Governu aseita estabelese Postu refere, maibe hafoin estabelese Suku rua hanesan Uaitame no Abafala retira nunee STAE labele implementa politika atendimentu karta eleitoral biometriku ba eleitores sira iha nivel Postu Kelikai Antigu.
Nia fundamenta, asuntu nee fo impaktu ba eleitores sira iha Postu Kelikai Antigu, tanba labele hetan atendimentu kartaun eleitoral biometriku nian iha nivel Postu hanesan eleitores sira husi Postu seluk neebe hetan atendimentu direita husi ekipa STAE iha nivel Postu.
“Nia impaktu ba ita nia komunidade, tanba komunidade sira labele trata sira nia dokumentus, tanba sira nia pozisaun husi Suku sira nee ba hamutuk ho Postu neebe seidauk klaru, ba ami STAE prontu deit kuandu diploma ruma mosu ami hatama ba sistema sira bele trata ona, maibe laiha diploma mak ida mai ami hakarak ho Kelikai ida fali mai ami hakarak hamutuk ho Kelikai Antigu entaun ami laiha baze legal atu defende ami nia aan ho razaun ida nee ami seidauk hatama sira nia Suku trata kartaun eleitoral,” Natividade akresenta.
Nia deklara, mezmu nunee maibe atendimentu ba eleitores sira husi Suku 5 hanesan Abafala, Afasa, Uaitame, Gurusa no Namanei neebe antes nee hamutuk estabelese Postu refere, daudaun eleitores sira nia kartaun eleitoral mantein ho Postu Kelikai no seidauk muda ba Kelikai Antigu, tanba seidauk iha baze legal no iha eleitores balun kontinua ezije hakarak hamutuk ho Kelikai Antigu no balun hakarak hamutuk ho Kelikai nunee seidauk iha desizaun, maibe Postu Administrativu Matebian neebe estabelese hamutuk ho Postu Kelikai Antigu laiha problema, tanba laiha eleitores ida ezije hakarak muda Postu.
Nia argumentu, problema Postu Kelekai Antigu nian too ona iha Ministeriu no iha ona despaisu husi Ministeriu, maibe parte STAE labele foti desizaun, tanba despaisu refere laos baze legal, nunee bainhira STAE atu foti desizaun ba asuntu refere tuir desizaun husi Jornal da Republika, maibe too ohin loron seidauk iha desizaun husi Jornal da Republika.
“Ministeriu dehan deit iha despaisu nia laran bazeia ba pedidu anterior, entaun pedidu anterior seidauk tama ba diploma ruma seidauk sai husi Jornal da Republika neebe nia impaktu nee ida ba ita nia komunidade i ida mak ita tau tiha ba mak iha problema entaun ita book tan sistema troka tan kartaun eleitoral gasta osan entaun ita evita buat sira nee hein desizaun iha tiha lai mak hatama ba sistema,” Natividade katak
Diretor nee komenta, problema Kelikai Antigu kona-ba Suku rua hanesan Uaitame no Abafala retira husi Postu Administrativu Kelikai Antigu ekipa Ministeriu Administrasaun Estatal hamutuk ho Autoridade Munisipiu Baukau koko rezolve problema refere, maibe too agora seidauk iha rezultadu.
Nunee STAE Munisipiu Baukau kontinua aprosima ho Autoridade Munisipiu Baukau atu koordena ho Ministeriu hodi aprezenta ba Prezidente da Republika bele halo promulgasaun no publika iha Jornal da Republika nunee bele iha desizaun final ba asuntu refere.
Jornalista: Tomas Reis
Editora: Carme Ximenes
