DILI, STLTIMORLESTE.com – Familia boot Suara Timor Lorosae (STL) realiza reflesaun ho tema “Sentidu Ora et Labora” tuir ema Katolika iha knaar loron-loron nian.
Reflesaun nee halao iha sala enkontru STL Corp, Osindo II Surik Mas, refleksaun nee diriji husi Romo Siriakus Ndolu O.Carm no hetan partisipasaun masimu husi dirijenti no funsionariu STL Corp.
Iha Evanjelhu Saun Lukas 10:38-42 koalia kona-ba Marta no Maria tuir dalan ho Jesus too knua ida, feto ida naran Marta simu Nia iha nia uma, Marta iha feton ida naran Maria neebé tur deit iha Jesus nia ain hodi rona Nia koalia, Marta fali lao ba lao mai servisu barak, hakbesik hodi dehan: Nai, Ita la haree katak hau nia alin husik hau, servisu mesak-mesak? dehan took ba nia atu tulun hau.
Nai hatan ba nia, Marta, Marta o lakole hodi hanoin resin kona-ba buat barak, maibe buat ida deit mak folin los, Maria hili buat neebe diak liu hotu, neebe ida sei la hadau husi nia.
Tanba nee koalia kona-ba Maria no Marta neebe hetan vizita husi Jesus hodi liga ho tema Ora et Labora mosu iha grupu tolu nebee ho hanoin la hanesan.
Romo Siriakus Ndolu O.Carm iha nia reflesaun hatete, iha evanjelhu Saun Lukas kona-ba Marta no Maria iha istoria Kristaun nian, evanjelhu mosu grupu tolu neebé nia hanoin la hanesan, grupu tolu mak hanesan grupu primeiru Maria sai superior, grupu segundu Marta sai superior no grupu terseiru integridade.
“Evanjelhu ohin nian Marta ho Maria mosu grupu tolu ne’ebé ita haree eskritura nee la hanesan, grupu primeiru neebe haree katak iha eskritura nee mak diak liu Maria, tanba nia tur iha Jesus nia ain hodi rona nia koalia, duke Marta neebe halo servisu,” hatete Romo Siriakus Ndolu, O.Carm liu husi reflesaun iha Sala Enkontru STL, Osindo II Surik Mas, Sesta nee (15/08/2025).
Romo Siriakus esplika, iha gurpu rua nee ema sira nee hatene katak superior mak Marta diak liu Maria, nunee hakerek nain neebe hakerek livru ne’e koalia kona-ba Marta nia hahalok, iha istória nee haree katak ida ne’e ajuda Maria nia hanoin atu halo tuir kona-ba servisu, sira hatete katak orasaun neebe Maria halo mak perfeitu, tan ne’e orasaun ne’e hetan bénsaun.
Nunee iha grupu tolu integridade, grupu ida neebe haree Marta no Maria hanesan elementu ida neebe labele haketak, basa hakerek nain hatete, nain rua nee maluk hela hamutuk iha uma nomos hadomi hotu Jesus.
Marta ho Maria repzenta dimensaun rua husi ema ida, tanba Romo Siriakus foti lia fuan Santo Agostinho nian neebe dehan halao orasaun makaas ba hanesan buat hotu depende ba Maromak ou reza makaas ba hanesan ema besik atu husik ona mundu nee.
Entretantu CEO STL, Salvador J.X.Soares hatete, iha moris presiza halo balansu, laos dehan reza mak importante, laos servisu deit mak importante, maibe reza importante servisu mos importante.
“Maibe tenke hanoin mos katak bainhira ita servisu hetan sorte diak buka fahe mos ba ema seluk no maluk sira neebe laiha, nee mak importante iha moris nee,” hatete CEO.
Nunee iha refleksaun nee Amu fo hanoin ba ita katak buat diak ida mos, antes atu mai servisu nee sai husi uma reza ba malu, nunee ba servisu bele hakmatek hodi halao knaar ho diak.
(joa)
